Erevandy ebil-sebil etkender kimder?

Armenııada quqyq qorǵaý organdary Erevandaǵy ishki ister bólimshesi ǵımaratynda poalısııa qyzmetkerlerin kepildikte ustap otyrǵan qarýly top múshelerimen kelissózdi áli jalǵastyryp jatyr. Al bul oqıǵanyń basy 17 shilde, jeksenbi kúni tań azanda bastalǵan edi. Bir top qarýly qaraqshy eldiń astanasyndaǵy Erebýnı aýdanynda ornalasqan polısııanyń patrýldi-post qyzmetiniń kúzet aımaǵyna ótip ketpekshi bolady. Biraq polıseıler olardy baıqap qalyp, toqtatýǵa áreket jasaıdy. Sol kezde eki arada atys bastalyp ketedi. Osy atysta terrorshylar bir quqyq qorǵaýshyny atyp óltirip, tórt polıseıdi jara­qat­tap, jeti tártip saqshysyn kepildikke aldy. Qaqtyǵys barysynda qaraqshylar qolynan polk komandıriniń orynbasary Artýr Vanoıan qaza tapsa, polkovnık Aram Ovannısıan, podpolkovnık Grach Hostegıan, kishi ofıser Gagık Mkrtchıan jáne operator Robert Aırapetıan jaraqat alady. Al shabýyl jasaýshylar qatarynan oq tıgen Tatýl Tamrazıan esimdi terrorshy aýyr jaǵ­daıda aýrýhanaǵa túsedi. Keıin anyqtalǵandaı, qalanyń Erebýnı aýdanyndaǵy polısııa ǵımaratyna shabýyl jasaǵan­dar radıkaldy oppozısııalyq «Jańa Armenııa» uıymy men «Quryltaıshy» parlament» qozǵalysynyń músheleri bolyp shyqty. Qaraqshylar polısııa qyz­metkerlerin kepildikke alǵannan keıin eldiń prezıdenti Serj Sargsıannan otstavkaǵa ketýdi jáne zańsyz qarý saqtaǵany úshin qamaýǵa alynǵan «Jańa Armenııa» uıymynyń lıderi Jıraır Sefılıandy qulyp astynan bosatýdy talap etti. Biraq Armenııa polısııa­sy basty­ǵynyń orynbasary Ýnan Pogosıan sol kúni buqaralyq aqparat quraldarynyń aldynda bergen brıfınginde terror­shylardyń bul talap­tarynyń birde-biri oryndalmaıtynyn ashyp aıtty. Budan keıin arnaıy bólimshe qyzmetkerleri polısııa ǵıma­ratyna shabýyl jasap, eki qyzmetkerdi kepildikten bosatyp aldy. Taǵy bir qyzmetkerdi qaraqshylardyń ózi sonyń aldynda bosatyp jibergen eken. Sonymen, olardyń qolynda taǵy tórt qyzmetker qalyp qoıdy. Olardyń arasynda Erevan qalasy polısııasy bastyǵynyń orynbasary Valerıı Osıpıan da bar. Qazir polısııa bólimshesine shabýyl jasap, tártip saqshylaryna jábir kórsetýshiler ústerinen qylmystyq is qozǵaldy. Sonymen birge, kepildikke alynǵan qalǵan polıseılerdi esh zalalsyz qamaýdan bosatyp alýdyń amaldary jasalyp jatyr. Armenııa astanasynda osynyń sońyn ala birneshe kún boıy jurtshylyqtyń ereýili bolyp ótti. Onda negizinen el prezı­dentin otstavkaǵa ketý talap etilýde. Negizi, elde mundaı kóńil kúıdiń kóterilýi tek búgin ǵana emes. Bıyl­ǵy jyldyń kókteminde de Erevanda bir­neshe kún boıy osyndaı sherý bolyp ót­ken edi. Biraq onda Taýly Qarabaq máse­lesi kóbirek alǵa tartylǵan bolatyn. Degen­men, bul jolǵy qozǵalysty da sol kez­derdegi qarsylyq qozǵalysynyń jal­ǵasy retinde baǵalaýǵa bolatyn sııaqty. Rýslan IGILIK