Qostanaı nege munartyp tur?

Qostanaı eki-úsh kúnnen beri munartyp tur. Tumannan góri tútinge kóbirek uqsaıdy. Son­dyqtan bolar, qostanaılyqtar órt sóndirý jáne apattan qutqarý qyzmetine telefon soǵyp, beıma­zalanǵan. «Kórshi Reseı ormandary órtenip jatyr eken» degen alyp-qashpa áńgimeler de tez arada tarap úlgerdi. Áńgimege sengendikten be, álde basqadaı beımálim sebepten be, alǵashqy kúni qalalyqtardyń murnyna tútin ıisi kelgendeı boldy. Reseı jaqyn bolǵanymen ondaǵy ormannyń órtinen Qostanaı qalasyn qashanǵy tútin tumshalap turmaq? Al qalany kireýkelep turǵan tútin bolsa da, tuman bolsa da, onyń erteńine qalyńdaı túskeni baıqaldy. Dala jelkem bolyp tur, sonda da álgi tútinniń tumshalanýy keter emes. Biraq Oblystyq tótenshe jaǵdaılar departamentindegiler Reseı jaq­ta ormannyń órtengeni týraly naqty aqparat joq ekenin aıtty. Áıteýir tabıǵattyń bul tylsymyna ań-tań qalǵandar kóp. – Muny negizi tabıǵat quby­lysyna jatqyzǵanymyz durys bolar. Bizdiń óńirde uzaq ýaqyt jańbyr jaýdy, aýanyń ylǵaly kóp. Tańerteńgi, keshki ýaqytta ylǵaldy aýanyń áserinen aınala tumshalanady, tuman túsedi, – dedi ınjener-sınoptık Antonına Shıbarshına. Al kún­diz kún ysı bastaǵanda da aınalanyń tu­mandanýy nemese shańdanýy sekildi kórinis ketpeı tur. Bul saýalǵa da sınoptık mamannyń óz boljamy bar eken. – Bizge Ońtústik batys Sibir men Ońtústik Oraldan aýa aǵy­sy kelip jatyr. Ol ońtústik Oraldaǵy tolyp jatqan zaýyttar men óndiristik kásiporyndardan shyǵatyn tútindi ákelýi múmkin. Sonymen qatar, Sibirde orman órtenip jatýy da yqtımal ǵoı, onyń tútini de aýa aǵysymen kelip jatqan bolar, – dedi Antonına Shıbarshına. Ádette, jel soqqanda sonaý Sibirdegi taıga túgil, ózi­mizde órtengen ormannyń tútini tarap keter edi. Sibir ormany men ońtústik Oraldaǵy zaýyttar tútinine Qostanaı suranys bergendeı, nege ol qalany tumshalap ketpeı tur? Bul da tabıǵat qubylysy ma? Jurttyń oıy san-saqta. Názıra JÁRIMBETOVA, «Egemen Qazaqstan» QOSTANAI