Búgin Germanııanyń Shvaınfýrt qalasynda toǵyzqumalaqtan erler men áıelder arasynda Eýropanyń ashyq chempıonaty bastaldy.
Dúnıejúzilik toǵyzqumalaq federasııasy baspasóz qyzmetiniń habarlaýynsha, chempıonatqa Germanııa, Fransııa, Grekııa, Shveısarııa, Ispanııa, Reseı, Chehııa sekildi onnan astam eldiń ókilderi qatysyp jatyr. Jarys shveısar júıesi boıynsha ótedi.
Qurlyq chempıonatynyń ashylý saltanatyna Dúnıejúzilik toǵyzqumalaq federasııasynyń prezıdenti Álıhan Baımenov, Qazaqstan Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Elsııar Qanaǵatov jáne Shvaınfýrt qalasynyń meri Karl Haıns Kaýchok qatysty.
«Toǵyzqumalaq - qazaqtyń dúnıejúzilik mádenıetke qosqan jarqyn úlesiniń biri. Chempıonat - ıntellektýaldyq saıys, mádenı shara ǵana emes, mádenı muramyzdy nasıhattaý joly. Bul – dúnıejúzilik federasııanyń qurylǵan kúninen bastap alǵa qoıǵan mindetteriniń biri», - dep atap ótti Álıhan Baımenov.
Dúnıejúzilik federasııa 2009 jyldan beri toǵyzqumalaqtan úsh ret álem chempıonatyn ótkizdi. Onyń sońǵysyna 25 eldiń ókilderi qatysty.
Chempıonattardyń ótýine Dinmuhammed Ydyrysov, Keńes Raqyshev, Erlan Áshim, Maqsat Ramanqulov, Erǵalı Ibragımov sekildi otandyq kásipkerler qoldaý kórsetip keledi. Sońǵy jyldary memleket tarapynan da toǵyzqumalaqty damytýǵa júıeli kóńil aýdarylýda. Qazirgi tańda toǵyzqumalaqpen aınalysatyn qazaqstandyqtar sany 200 myńnan asty. Alda Azııa chempıonatyn uıymdastyrýǵa Qytaı ókimeti de qoldaý kórsetýge nıet bildirip otyr.
Eýropa chempıonaty barysyndaǵy halyqaralyq týrnırge Qazaqstan ulttyq qurama komandasy músheleri de qatysyp, sheteldik sportshylardyń sheberligin arttyryp, tájirıbe jınaqtaýyna kómek kórsetedi. Jarysqa qatysýshylar men toǵyzqumalaq áýestenýshileri – negizinen Eýropa elderinde turyp jatqan jergilikti halyq.
Chempıonat aıasynda, sondaı-aq, ulttyq oıyndy halyqaralyq deńgeıde odan ári damytý máseleleri de keńinen talqylanady.
Chempıonat 24 shilde kúni márege jetedi.
Rýslan IGILIK
