Avtoónerkásip kóliktini kóbeıtti

Sońǵy jyldary álemdegi ekonomıkalyq daǵdarys birqatar óndiris oshaqtarynyń qarqynyn báseńdetkeni ras. Onyń qatarynda elimizdiń avtoónerkásip salasy da bar. Mundaı jaǵdaıǵa tek bizdiń ǵana emes, ózge de damyǵan elderdiń avtoónerkásipteri tap bolyp otyr eken. Bul jóninde Ortalyq kommýnıkasııalar qyzmetinde bolǵan baspasóz máslıhatynda Investısııalar jáne damý mınıstrliginiń resmı ókili Qaısar Jumabaıuly aıtty. Resmı ókil ekonomıkalyq qıyn­dyqtarǵa qaramaı avtoóner­kásip áli de ári qaraı damı bereti­nin jetkizdi. «Kanada, Argen­tına, Avstralııa, Reseı, Japonııa, О́zbekstan syndy elder de qazirgi kúnde qazaq­standyq áriptesteriniń kúıin keship otyr. Áıtse de, otandyq avtoónerkásipter óndiristi shamaly baıaýlatqanymen damý jolyn áli de jalǵastyryp keledi. Máselen, salanyń el ekonomıkasyndaǵy úlesi aıtarlyqtaı. Naqty san­dar­ǵa júginsek, bıylǵy birin­shi jartyjyldyqtyń qorytyn­dysy boıynsha otandyq avto­óner­kásiptiń Qazaqstan ekono­mı­kasyndaǵy úlesi 36,6 mlrd. teńgeni qurap otyr», dedi Q.Jumabaıuly. Bul jerde tek jeńil avto­kólik­ter ǵana aıtylyp otyr­maǵa­nyn eskertken resmı ókil, elimizde tirkemeler men aýyr mashı­nalar qurastyrý isi de jaqsy jolǵa qoıylǵanyn atap ótti. «Bul óńdeýshi ónerkásiptiń birqatar negizgi salalaryndaǵy kórset­kishten kóbirek. Mysaly, avtoónerkásiptiń ishki jalpy ónimge qosqan úlesi jeńil óner­kásip, qaǵaz ónerkásibi, farmasevtıka, toqyma ónerkásibi, elektronıka, jıhaz óndiristerinen áldeqaıda joǵary boldy», degen ol, avtoónerkásip salasy ekinshi jartyjyldyqta taǵy da nyǵaıa túsetinin jetkizdi. Elimizdegi avtoónerkásiptiń damýynda memlekettik qoldaýdyń orny erekshe bolyp otyrǵanyn aıtqan spıker, ótken jyly bas­tal­ǵan jeńildetilgen avtonesıe jóninde de áńgimeledi. «О́tken jyly jeńildetilgen avtonesıe memlekettik baǵdarlama­sy bas­tal­ǵan bolatyn. Sodan beri jeke adamdar avtokólik satyp ala bastady. Búgingi kúnge deıin 6 757 adam avtonesıeniń arqasynda jańa kólik satyp aldy. Bul ındýstrııalyq-ınnovasııa­lyq damý baǵdarlama­sy aıa­synda júzege asyp otyrǵan shara jáne jalǵyz mehanızm emes. Budan da basqa bıznesti qoldaý­ǵa ar­nalǵan tetikter bar», dedi Q.Jumabaıuly. Resmı ókildiń aıtqandaryna den qoısaq, otandyq avtoónerkásip ındýstrııalandyrýdyń ekinshi bes­jyldyǵynyń basym baǵyt­tary­nyń qataryna engizilipti. «Indýs­trııa­landyrýdyń ekinshi bes­­jyl­dyǵynda, ıaǵnı 2015-2020 jyl­darǵa arnalǵan baǵdarlama­da avto­ónerkásipke aıtarlyqtar kóńil bólinýi tıis dep jos­parlap otyrmyz. О́ıtkeni, birinshi be­s­jyldyqta bul sala damý boıyn­­sha aldyńǵy qatarly eke­nin tolyq dáleldedi. Taǵy da naq­ty sanǵa júginsek, birin­shi bes­jyl­dyq boıynsha avto­óner­kásip 4,8 esege ósken», dep oıyn tolyqtyrdy ol. Onyń aıtýyna qaraǵanda, avtoónerkásipter qazirgi bes jyldyqta ónimniń qazaqstandyq úlesin kóbeıtip, kem degende 50 paıyzǵa deıin jetkizýdi maqsat etip qoıypty. Resmı ókildiń ılandyrǵany, mundaı mejeni baǵyndyrýǵa otandyq avtokásip­oryndarynyń múmkin­digi bar eken. Máselen, avtomobılderdiń qosalqy bólshekterin óndirý men salada jańa jumys oryndaryn ashýdy 3,5 esege deıin arttyrý kózdelip turǵanyn aıtty. Bularmen qatar, qazaqstandyq avtoónimderdi eksportqa shyǵarý isi de myqtap qolǵa alynyp jatqan kórinedi. Nurbaı ELMURATOV, «Egemen Qazaqstan»