Túlkibas sýdan taryqpaıtyn bolady

Ońtústik Qazaqstan oblysynda elektr qýatyna tapshylyq bar. Syrttan tasymaldanǵannan keıin shyǵyny da kóbeıip, qarapaıym halyqtyń qaltasyna aýyr tıedi. Biraq, bári birdeı bolmasa da aryndy ózen, bulaqtary bar óńirlerde osy ózekti máseleni ońtaıly sheshýge múmkindikter bar. Ońtústik Qazaqstan oblysynda gıdroenergetıka salasyn damytýǵa jáne energııa tap­­­­shylyǵyn tómendetýge ba­ǵyttalǵan jańartyla­tyn jáne balamaly energııa kózderi sa­la­syndaǵy jobalardy júzege asyrý, sondaı-aq, Ońtústik ózen­deriniń gıdroenergetıkalyq áleýetin anyqtaý maqsatynda gıd­roenergetıkalyq ónerkásip sarapshylarynyń qatysýymen marketıngtik zertteýler júrgizil­gen bolatyn. Osy zertteýlerdiń nátıje­sinde oblystaǵy jıyrmaǵa jý­yq ózenderdegi 43 áleýetti núk­teden jalpy syıymdylyǵy 119,84 mVt-ǵa jetetin energııa kózi anyqtalǵan. Endi osy ózenderge gıdroelektrostansa salý úshin qolaıly jerler tań­dalynyp, jobaǵa ınvestısııa tartý kózdelgen edi. Túbinde qaı­tarymy mol jobaǵa ınvestorlar tabylǵan. Jaqynda «Shymkent» ÁKK» UK» AQ pen túrkııalyq «Endustriel Elektrik Elektronik San. Ve Tic. Ltd» kompanııasy arasynda ınvestısııalyq jobany júzege asyrý boıynsha yntymaqtastyq týraly memorandýmǵa qol qoıyl­dy. Atalǵan memorandýmǵa sáıkes, Túlkibas aýdanyndaǵy Ma­shat ózeni boıynda jalpy qýattylyǵy 4,2 mVt quraıtyn shaǵyn gıdroelektrostansa qury­lysyn júzege asyrý keli­simine qol qoıyldy. Aldyn ala bol­jam boıynsha jobanyń quny 6,3 mln. dollarǵa jetedi. Qazirgi ýaqytta Túlkibas aýdany aıyna 15 mVt elektr energııasyn tutynyp otyr. Joba iske qosylǵan soń jańa elektr stansasy aýdan qajettiliginiń úshten birin qamtıtyn bolady. Sonymen qatar, «Balamaly energııa kózderin paıdalanýdy qoldaý jáne esep aıyrysý boıynsha qarjylyq ortalyǵy» JShS-niń jobanyń qurylysy aıaqtalǵannan keıin elektr energııasyn uzaq merzimge satyp alýdy qamtamasyz etýge múmkindik bar. Eki jaqqa da paıdaly joba eki tarapty da qanaǵattandyryp otyr. Mundaı tıimdi jaǵdaı Ońtústik tájirıbesinde bar. Bıyl Shardara GES-i kúrdeli jóndeýden ótip, jańa zamanaýı taǵy bir qazandyǵyn iske qos­ty. Turǵyndarǵa arzan elektr qýatyn berýge ázir. Taý basynan qulaǵan aryndy ózenderi bar Túlkibas aýdanyn­da da halyqqa arzan energııa kózin usynýǵa osyndaı tıimdi joba usynyldy. Kezekte Saıram-О́gem shatqalyndaǵy Sharbaqty sııaqty aǵysy joıqyn ózender bar. Baqtııar TAIJAN, «Egemen Qazaqstan»