Balalarǵa qamqorlyq

Ata-ana qamqorlyǵynsyz qalǵan balalar qashanda kómekke zárý. Bul baǵytta oblysta jaqsy jumystar jasalýda. Sonyń eń bastysy – olardy turǵyn úımen qamtamasyz etý. Ata-ana qamqorlyǵynsyz qalǵan bala­larǵa arnalǵan áleýmettik úı oblys ortalyǵynyń Kirpishti eldi meke­ninde salynatyn boldy. Oǵan «Sábı» qoǵamdyq qory esebinen 1,2 mlrd. teńge bólinedi dep kútilýde. Áleý­mettik úıde 80 adam, onyń ishinde múm­kindigi shekteýli balalarǵa arnalǵan ınternattyń túlekteri turatyn bolady. Olarǵa bólek páterler beriledi. Salynyp jatqan áleýmettik úıdegi bir páterdiń jalpy aýdany 40 sharshy metr. Turǵyn úıge jaqyn mańda densaý­lyǵynda aqaýy bar turǵyn­darǵa jalaqy alýǵa múmkindik beretin shaǵyn seh qurylysy júrip jatyr. Naq­tyraq aıtqanda, kondıterlik ónimder shyǵaratyn, aıaq kıim jón­deıtin seh, tigin sehy, ustahana jáne jóndeý sehy, sonymen birge, shashtaraz ben massaj ortalyǵy paıdalanýǵa berildi. Áleýmettik úıde saýyqtyrý qural-jabdyqtary, relaksasııa zaldary bolady. – Biz balalar úıleri men maman­dandy­rylǵan mektep-ınternat túlekteriniń taǵdyryn baqylaýda ustap, olarǵa jan-jaqty kómek kórsetýimiz kerek. Eń bastysy – jumyspen jáne baspanamen qamtamasyz etý. Ol úshin barlyq kúshti salý qajet, – dep atap ótti óńir basshysy. Qazirgi tańda Aqtóbe oblysynda 70 orynǵa eseptelgen Jasóspirimder úıi jumys isteıdi. Oblystyq ınternat mekemeleriniń túlekteri onda 23 jasqa deıin tura alady. Al áleýmettik úıde 16-29 jas aralyǵyndaǵy túlekter turady. Satybaldy SÁÝIRBAI, «Egemen Qazaqstan» Aqtóbe oblysy