Batyr eskertkishi kútimge zárý

Elbasymyzdyń tapsyrmasy boıynsha bıyl elimizdiń barlyq óńirlerinde qoǵamdyq keńester quryldy. Keńes quramyna ártúrli sala mamandary, úkimettik emes uıym ókilderi kirgen. Búginge deıin Semeıde keńestiń eki otyrysy ótti. Alǵashqy otyrys jerge qatysty bolǵandyqtan, onda jerdi óńdep, jónimen paıdalaný máselesi qarastyryldy. Ekinshi otyrys ta jer týraly boldy, biraq, qala ishindegi jerdi qoldaný jaıy qozǵaldy. Semeı qalalyq soǵys jáne eńbek, Qarýly Kúshter ardagerleri keńesiniń tóraǵasy, qoǵamdyq keńes múshesi Amantaı Doǵalaqovtyń aıtýynsha, aldaǵy otyrysta qaralatyn máseleler qalany abattandyrýǵa qatysty bolmaq. Sebebi keńes múshelerin Jeńis saıabaǵynyń bıyl kógaldan­dyrylmaýy alańdatyp otyr. Gúl egiletin jerlerdi shóp basqan. Al vokzal mańyndaǵy Qabanbaı batyr eskertkishi aıanyshty halde. – Qalanyń ishinde arhıtektýra jaǵynan talapqa saı emes ári burynǵy qalpy buzylǵan nárseler óte kóp, – deıdi Semeı qalalyq soǵys jáne eńbek, Qarýly Kúshter ardagerleri keńesiniń tóraǵasy, qoǵamdyq keńes múshesi Amantaı Doǵalaqov, jerdi qalaı bolsa solaı alǵan. Bas josparǵa qaramaı, qyzyl syzyqtan ótip ketken. Bulardyń barlyǵyn, mine, qoǵamdyq keńeste qarastyryp jatyrmyz. Jıynymyzǵa únemi sáýlet, qala qurylysy bólimi men Jer komıtetinen ókilder qatysyp, tyńdap otyrady. Bu­larǵa qoǵamdyq keńes atynan óz pikirimizdi aıtyp jatyrmyz. Keleshekte jumystaryn jaq­sartyp, jandandyrǵandary jón. Jeńis saıa­baǵyna kútim ke­rek. Munda jyl saıyn jaz­ǵyt­urym 9 mamyrǵa taman qyz­ǵal­daq ósip turýshy edi, bıyl otyr­ǵyzylmady. Sosyn qala­daǵy ortalyq temirjol vok­zaly aldyndaǵy Qabanbaı ba­tyr eskertkishi qaraýsyz qaldy. Mańaıy qoqysqa tolyp, tuǵy­rynyń sylaǵy túsip qalǵan. Aına­lasyndaǵy shóp qýrap, shashylyp jatyr, uıat. Vokzalǵa nebir adamdar kelip-ketip jatady. Tipti, myna kórshi Reseıden de keletinder bar. Qabanbaı batyr eskertkishi jóndelse, kútimge alynsa dep birneshe márte aıttyq. Jeke kásipkerler qoldaý kórsetip jiberse sheshiletin sharýa ǵoı. Qoǵamdyq keńestiń ıyǵyna artylǵan júk aýyr bolyp tur. Basty maqsattary áleýmettik jaǵdaıdy jaqsartyp, ekonomıkany, ekologııany qýattandyrýǵa baǵyttalǵan. Sondyqtan eskertkish kútimi sııaqty máselelerdi bıýd­jettiń qorjynyna telmirtpeı, jeke kásipkerlerdiń demeýshilik kómekteri arqyly sheshse degen usynystaryn aıtyp otyr. Raýshan NUǴMANBEKOVA SEMEI