Qolań shashty qyzdardyń aýyly

Qytaıdyń Gýansı-Chjýan avtonomııalyq provın­sııasyndaǵy bir aýylda eń shashy uzyn qyzdar turady eken. Bul aýyldaǵy boıjetkenderdiń shashynyń uzyndyǵy shamamen 2 metrdeı bolady. Aýyldy mekendeıtin ıao taıpasynda uzyn shash mol baılyq pen uzaq ǵumyrdyń sımvoly sanalady. Sol sebepti, qyz balalardyń shashyn dúnıege kelgen kúnnen bastap ósire bastaıdy. Bul jaqta shashy qysqa qyzdar kóriksiz sanalady. – Biz shashymyzdy týǵan kúnimizden bastap ósirdik. Jasymyz 18-ge tolǵannan keıin ǵana arnaıy kámeletke tolý rásimin ótkizip, shashymyzdy qııamyz. Iаǵnı, bul qyzdardyń boıjetkenin, endi turmysqa shyǵýǵa daıyn ekenin bildiredi. Osy rásimnen keıin boıjetkender kóp uzamaı turmys qura bastaıdy. Bizdiń aýylda shashy qıylǵan qyz kórseńiz, olar turmysqa shyqqan, otbasyly degen sóz, – deıdi jergilikti bir boıjetken. Bul  aýylǵa keletin týrısterdiń de qarasy qalyń. Jyl saıyn qolań shashty qyzdardy bir kórý úshin aýylǵa 300 myńnan astam adam keledi eken. Nurtóre SAMARHAN