Qutqarýshy mysyqty marapattady

Ulybrıtanııada ıelerin órtten qutqarǵan Tınk degen mysyq «Jyl mysyǵy» atandy. Ony marapattaý saltanaty Londonnyń qaq tórindegi záýlim qonaqúıde janýarlardy qorǵaýshylardyń, jýrnalısterdiń qatysýymen ótti. Aqyldy mysyq Kler Hopkın­sonnyń otbasymen birge Shrýsberı qalasynda turady eken. Bir kúni tún ortasynda dál irgedegi kórshi úıdiń otqa oranǵanyn kórgen mysyq shyrt uıqyda jatqan qojaıynynyń ústine sekirip, tyrnalap oıatyp alypty. Sóıtip, mysyqtyń arqasynda Kler hanym kúıeýi men balalaryn oıanyp, órt ózderiniń úıine taraǵanǵa deıin dalaǵa shyǵyp úlgergen.  Qojaıynynyń aıtýynsha, mysyq bolmasa, bir úıli jan tirideı órtenip ketedi eken. Buǵan deıin Shvesııada Nalle degen mysyq ta ıesin qutqaryp qalǵan edi. Ol qýat kózine qosylyp turǵan smartfonnyń tútindeı bastaǵanyn kórip, uıyqtap jatqan qojaıynyn oıatyp alypty. Sóıtip, ol mysyq ta túrli tok-shoýlardyń qadirli meımany bolyp, az ýaqytta juldyzǵa aınalǵan kórinedi. Nurhan ASQAR