«Mańyzsyzyn mańyzdymen yǵystyrý» demekshi, elimizdegi til mártebesin kóterý maqsatynda qosa alatyn taǵy bir úlesimiz – memlekettik tildiń meńgerilý deńgeıin SAT úlgisinde tekserý. Atalmysh emtıhannyń oqylym hám jazý men til bólimderinde kóbinese ádebı shyǵarmalar ıakı ǵylymı-kópshilik jýrnaldar maqalalarynan úzindiler tapsyrmaǵa sáıkestelip usynylady. Bul júıe arqyly amerıkalyqtar aǵylshyn tiliniń sapaly da saýatty túrde berilýin qadaǵalap qana qoımaı, aǵylshyn tilindegi ádebıetpen de mıllıondaǵan talapkerdi júzdestiredi. Adamzattyń óshpes ustazy – kitap, jáne ony oqýǵa degen, sonyń ishinde, ásirese, qanǵa jaqyn, óziniń bolmys-rýhyndaı ulttyq ádebıetti oqýǵa degen Qazaqstan jastarynyń yqylasyn oıatýdyń birden-bir joly – asyl sózdi túsinýge úıretý. Osylaısha, jas urpaqtyń boıynda aq-qarany ajyratý, logıkasyn jáne maqsatqa jetý qabiletterin shyńdaýǵa bolady.
Kóptegen jastardyń jáne ǵalymdardyń pikirinshe, «bolmasań da, uqsap baq» demekshi, búgingi tańdaǵy mańdaıaldy memleketterdiń bilimge degen, bilim damýyna degen kózqarastarynan bizge úlgi alý zııan emes. Elimizdegi talapkerler úshin bolashaqta paıdaǵa asyratyn synı turǵydaǵy logıkalyq oılaý qabiletterin, memlekettik tildi bilýi jáne ǵylymdardyń patshaıymy – matematıkanyń negizderin eskere júrýi olardyń «Qazaqstan-2050» Strategııasynyń naǵyz tiregi atanýyna mol septigin tıgizeri anyq.
Bolashaq – jastardyń qolynda, al sol jas talapty kemel jolǵa bastaıtyn úlken synaqtyń zerdesi, básekege qabiletti bolýy – Táýelsizdik órleýiniń de bir kórinisi. Endeshe, jastardy, óskeleń urpaqty jattaýǵa emes, oılaýǵa baýlıyq.
Bıbarys SEITAQ
ASTANA
