Astana qalasynda Qazaqstan halqy Assambleıasynyń uıymdastyrýymen «Medıasııa kúni» atty respýblıkalyq aksııa sheńberinde Ashyq esik kúni ótti.
Qazaqstanda sot otyrystarynyń balamaly túri sanalǵan medıasııa kóp qoldanyla bermeıdi, alaıda, bul – azamattyq daýdyń sotsyz jáne tergeýsiz sheshimin tabatyn zańnyń túri. Ol ataýy jańa bolǵanmen, ata dástúrimizde qalyptasqan aýzy dýaly aqsaqaldar men týra sózdiń túbin túsiretin bıler sóziniń zańdy jalǵasy bolyp tabylady. Qazaq tarıhyna kóz júgirtseńiz, «Qasym hannyń qasqa joly», «Esim hannyń eski joly», Táýke hannyń «Jeti Jarǵysy» osy kúnge deıin saqtalyp, zańymyzdyń zańdy jalǵasy bolyp kele jatyr. Sol kezdegi bı, aqsaqaldar halyqtyń arasyndaǵy túrli daý-janjaldardy bir aýyz sózben aqyldasa, keńese otyryp sheship otyrǵan. 2011 jylǵy 28 qańtarda Elbasy N.Á.Nazarbaev Qazaqstan Respýblıkasynyń «Medıasııa týraly» Zańyn bekitken bolatyn. Búgingi kúnde bul is júzege asyrylyp, júıesin tabýda. Sonymen qatar, bıylǵy jyldyń 30 shildesinde Qazaqstan halqy Assambleıasy men Qazaqstan Joǵarǵy soty medıasııa ınstıtýtyn damytýǵa baılanysty memorandýmǵa qol qoıdy.
Astana qalasy boıynsha jyl basynan beri 910 medıasııalyq jumys qabyldandy. Onyń 671 isi sottyq medıasııa qyzmetkerleriniń qatysýymen ótken. Medıasııanyń arqasynda qylmystyq isterdiń jeńil túri sotqa jetpeı, sheshimin taýyp otyr. Sońǵy jarty jylda sotta bitimgerlik rásimderdi qoldanǵannan keıin talapkerler bıýdjetke tólengen memlekettik bajdardy qaıtaryp alý jeńildikterin paıdalanyp, 200 000 000 teńgeni óndirip aldy, onyń ishinde qaıta qaraý satysy 26 000 000 teńgeni qurady.
Aıman MUQYShEVA
