Qurylysshylarǵa qurmet

Shamamen 170 kúnnen soń Almaty qalasy «Ýnıversıada-2017» sport­tyq oıyndary saltanatyn qar­sy alady. Qurylysshylar kúni  qurmetine oraı  ótkizilgen merekelik jıynda qala ákimi Baýyrjan Baı­bektiń bul álemdik sport jary­synyń máni men maǵynasyna erekshe toqtalýynyń syry da sonda jatqan edi. Qazaqstan «Ýnıversıada-2017» sporttyq oıyndaryna 950 mıllıon­daı AQSh dollaryn jumsaıtyny buǵan deıin belgili bolǵan jaıt. Osynaý qarajatqa ońtústiktegi bas shaharda Muz saraıy men eki muz aıdynyn, stýdentter men olım­pıadalyq qalashyqtardy, Alma­ty áýejaıyndaǵy halyqaralyq ter­mınal qurylysyn salyp bitirý kózdelgen. Úlken shara­ǵa qarajattyń meılinshe az jumsa­lýyna Almatydaǵy 2011 jylǵy ótken Azııa oıyndary kezinde tur­ǵyzylǵan sport ǵımarattarynyń edáýir septigin tıgizgeni de aqıqat. Búgingi tańda joǵaryda aıtylǵan negizgi qurylys nysandary salynyp bitip, paıdalanýǵa berildi. Qala ákimi olardyń birqataryn ózi bas bolyp qabyldady da. Almatyda asa mańyzdy óte úlken eki jol aıryǵynyń qurylysy aıaq­talatyn kún de taıaý. Munyń syr­tynda kún sáýleli shaharda kún sanap kókke boı kótergen jańa ǵı­marattar men turǵyn úı keshenderi­niń ózi qanshama! Almaty qalalyq qurylysshylar kásipodaǵynyń tóraǵasy Serikhan Kenjebekov bylaı deıdi: – Almaty qurylysynda 40 jyldan beri eńbek etip kelemin. Meniń biletinim, qala qurylysy 2007-2008 jyldary azdap saıabyrsyǵanymen, eshýaqytta áýelgi ózine tán ekpininen jańylǵan emes. Kásipodaq quramyna kiretin 5000 qurylysshy – olardyń arasynda metro, sport ǵımarattary, metall qurylǵylary men turǵyn úı ǵımaratynda eńbek etetinder bar. Bir sózben aıtqanda, bizdiń qu­ry­lysshylarymyz aldyńǵy býyn aǵalardyń eńbek dástúrin laıyqty jalǵastyryp keledi. Jambyl atyndaǵy fılarmonııada mereke qurmetine saı laıyqty marapattaýlarǵa ıe bol­ǵan qurylysshylarǵa arnap Qa­zaqstannyń belgili óner sheberleri án men jyrdan shashý shashty. Talǵat SÚIINBAI, «Egemen Qazaqstan» ALMATY Sýretti túsirgen Nurmanbet QIZATOV