DÚBIR

JÚLDELER JIYNTYǴY

№	Quramalar	Altyn	Kúmis	Qola	Barlyǵy
1	AQSh	46	37	38	121
2	Ulybrıtanııa	27	23	17	67
3	Qytaı	26	18	26	70
4	Reseı	19	18	19	56
5	Germanııa	17	10	15	42
6	Japonııa	12	8	21	41
7	Fransııa	10	18	14	42
8	Ońtústik Koreıa	9	3	9	21
9	Italııa	8	12	8	28
10	Avstralııa	8	11	10	29
21	О́zbekstan	4	2	7	13
22	QAZAQSTAN	3	5	9	17
31	Ýkraına	2	5	4	11
38	Grýzııa	2	1	4	7
39	Ázerbaıjan	1	7	10	18
40	Belarýs	1	4	4	9
42	Armenııa	1	3	0	4
58	Tájikstan	1	0	0	1
69	Lıtva	0	1	3	4
78	Moldova	0	0	1	1
78	Estonııa	0	0	1	1

Jambyl jampozyn qarsy aldy

Jambyl jurtshylyǵy Rıo-de-Janeıroda ótken HHHI jazǵy Olımpııalyq oıyndardyń kúmis júldegeri Eldos Smetovti erekshe qurmetpen kútip aldy. Saltanatty shara Taraz – Alma­ty baǵytyndaǵy qala qaqpa­synda bastaý alyp, Qazaqstan Respýblıkasy Tuńǵysh Prezıdenti atyndaǵy saıabaqta jalǵasyn tapty. Jambyl oblysynyń jurty el qorjynyna alǵashqy kúni-aq júlde salǵan jampozyn qarsy alýǵa kóptep keldi. – Oblystan baıraqty báseke­lerde top jarǵan Jaqsylyq Úsh­kempirov, Islam Baıramýkov, Baqtııar Artaev, Bolat Jumádilov, Aqjúrek Tańatarov sekildi talaı tarlandar shyqqan. Mine, endi sen de osy tulǵalardyń qataryna qosylyp, tórtkúl dúnıe kóz tikken alamanda qazaq eliniń týyn kókke jelbirettiń. Seniń jeńisińe búkil qazaq eli, Jambyl jurty dán rıza. Seni shyn júrekten quttyqtaı otyryp, alda áli talaı belesterdi baǵyndyrýyńa tilektespiz, – degen Taraz qalasynyń ákimi Nurjan Kalenderov Eldos Smetov pen jat­tyqtyrýshysyna shapan japty. Al Jambyl oblystyq ardagerler keńesiniń tóraǵasy Erkinbek Soltybaev Eldosqa el bolyp jankúıer bolǵanyn aıta otyryp, aq batasyn berdi. Olımpıadanyń kúmis júldegeri óz kezeginde barsha jankúıerlerge alǵys bildirdi. – Armysyń qazaq eli, Jambyl jurty! Eń birinshi Jaratqanǵa, odan soń ata-anama alǵysym sheksiz. Jattyqtyrýshylarymnyń eńbegin de basa aıtqym keledi. Maǵan jankúıer bolyp, senim artqan barsha jankúıerlerge rahmet! Alda talaı jeńisimniń kýási bolasyzdar dep oılaımyn! – dedi Eldos. Saltanatty shara sońynda turǵyndar Eldos Smetovpen estelik sýretke tústi. Oralhan DÁÝIT, «Egemen Qazaqstan» TARAZ

«Ivan senimdi aqtady»

El qorjynyna qola medal salǵan boksshy Ivan Dychko Qostanaı oblysyna qarasty Rýd­nyı qalasynda turady. Bylǵary qolǵap sheberiniń ata-anasy Fedor Ivanovıch pen Olga Vla­dımırovna, kelinshegi Marına men qyzy Mıroslava onyń rıngtegi shaıqastaryn teledıdardan kórip, jankúıer boldy. El men erdiń namysy tarazyǵa túsken sátte sportshynyń ákesi Fedor Ivanovıch erekshe tolqyǵan eken. – Fedor Ivanovıch, ulyńyz sharshy alańǵa shyqqanda qandaı sezimde boldyńyz? – Men balamnyń rıngtegi barlyq kezdesýlerin tikeleı efırden kórdim. Onyń qarsylastary kóldeneń kók attynyń biri emes. Shetinen myqty, qımyly shı­raq júırikter. Sondaı qarsy­lastarǵa toıtarys berip, jeńis týyn julyp alý aıtýǵa ǵana ońaı. Jartylaı fınaldaǵy báse­kede qatty qobaljydym. Jek­pe-jek bastalardyń aldynda Ivanmen Skype jelisi arqyly sóılesken edim. Ol Rıo-2016 Olım­pıa­dasynyń jóni bólek ekenin aıtty. Sondyqtan, brıtanııalyq boksshy Djoı Djoıspen ótetin kezdesýge barynsha muqııat daıyndaldy. Rıngtegi shaıqasty Ivannyń kelinshegi Marına men nemerem Mıroslava kórip, qoldaý kórsetti. Al anasynyń qobaljyǵany sonsha, kógildir ekran aldyna jaqyn­damady. Nemerem aldaǵy jeltoqsan aıynda eki jasqa tolady. Ol áli bala ǵoı. Ákesiniń boksshy ekenin túsinbeıdi. Biraq teledıdardan kórgende qolyn shapalaqtap, máz boldy. – Ivannyń júlde alatynyna sendińiz be? – Árıne. Men júlde alatynyna sendim. Ol senimdi aqtady. Olımpıada medalin altyn, kúmis ne qola dep ból­meımin. Eń mańyzdysy, ol júlde aldy. Sport – ómirdiń bir bólshegi. Sondyqtan, qýanyshty sátterimen qatar «áttegen-aı» deıtin tustary da bolady. Sport degenimiz – baqtalas, jantalas. Birde baq shabady, birde bap shabady. Ivannyń jartylaı fınaldaǵy jekpe-jegine kóńilim tolady. Ol elimizdiń kók baıraǵyn Rıo tórinde jelbiretti. Men osyndaı batyr ulymdy maqtan tutamyn. Bul jeńis – barsha qazaqstandyqtardyń jeńisi. Ivannyń jattyǵýyna kóńil ból­gen bir top azamattardyń eńbegi. – Boksshy ata-anasynyń tilegi qandaı? – Rıo-de-Janeıro men bizdiń elimizdiń arasyndaǵy ýaqyt aıyr­­mashylyǵy segiz saǵat. Ol bizden jyraqta júrse de, jıi-jıi habarlasyp turady. Bárimizdi alańdatqan uıqysyz túnder artta qaldy. Arqadan bir júk túskendeı boldy. Sanaýly kún­derden soń Ivan óz ortamyzǵa oralady. Sol kúndi asyǵa kútip júr­miz. Elimiz­diń abyroıyn as­qaq­tatar sportshylarymyzdyń sa­ny kóbeıe bersin. Alǵa, Qazaq­stan! Áńgimelesken Qymbat DOSJANOVA QOSTANAI