Áke jolyn qýǵan qyz

Soltústik Qazaqstan oblysy, Aıyrtaý aýdany, Kamen­nyı Brod aýylynda turatyn Syzdyqovtar otbasynyń qýanyshyna, jarqyn jeńisine ortaqtasyp, quttyq­taýshylar qatary kóp. Shalǵaı eldi mekendi qonys etken áke-sheshesi Ánýarbek pen Márzııada tipti es joq. Ánýarbek jastaıynan sport­tyń birneshe túrimen aınalysqan. Mektepte oqyp júrgende aýdan­dyq, oblystyq báıgelerdiń aldyn bermegen. Al otbasyndaǵy 4 ul-qyzdyń arasynda jolyn qýǵany Elmıra boldy. – Bir kúni Saran qalasynda balalar jáne sport mektebiniń dırektory bolyp jumys isteıtin aǵamnyń balasy Raıymbek aýylǵa kelgende, Elmıramnyń sportqa degen erekshe ynta-yqylasyn baıqap, Qaraǵandyǵa alyp ket­kisi keldi. 7 synypta oqıtyn qyzy­myzdy balasynyp júrgen biz bastapqyda kelispedik. Alaıda, qabyrǵamyzben aqyldasa kelip, baǵyn baılamaýdy oıladyq. Á.Moldaǵulova atyn­daǵy daryndy balalarǵa arnalǵan ma­man­dandyrylǵan sport mektep-ınternatqa túsip, so­dan keıingi ómiri kúrespen ty­­ǵyz jalǵasyp keledi,–deıdi Ánýar­­bek ótken kún­derdi eske alyp. – Elmıra alǵashqy beldesýde jeńilgende qatty qobaljyǵan bolarsyzdar? – Ataǵynan at úrketin reseı­lik balýan qyzdy Elmıra burynnan biletin. Qaı jarysta ekeni esimde joq, utqany da bar. Á degennen sátsizdikke ushyrasa da, júldeger bolady-aý degen senim­di joǵaltpadyq. Natalıa Voro­bevanyń jartylaı fınalǵa shyǵýy qola úshin beldesýine jol ashyp, kóńilimizdegi úmit otyn tutatty. Iá, Elmıranyń boz kilem ústindegi kezdesýleri, jeńiske degen erekshe qushtarlyǵy, qaı­sar minezi bárimizdiń kóz aldy­myz­da, óte tánti etti. Juba­nysh beldesýiniń birinshi keze­ńinde monǵol Ochırbatyn Nasanbýrmany 3:1 esebimen tize búktirdi. Odan keıin mysyrlyq Enas Mustafany qalaýynsha ıliktirip, 3 upaı esebimen basym tústi. Osylaısha qazaq qyzdary arasynda kúresten Olımpıada júldesine ilikken tuńǵysh sport­shy atanyp, esimi altyn árip­termen jazyldy. – Aıtpańyz, – deıdi Ánýar­bektiń apasy, osynda mektep dırektory qyzmetin atqaratyn Aıjan Syzdyqova. – «Balasy atqa shapsa, anasy úıde taqymyn qysady» demekshi, Elmıramyz kúresedi degende, inimniń shańy­­raǵyna aýyl bolyp jınalyp, sarala tańdy saryla kútip otyrdyq. Mońǵol qyzyn jeńgende, ústimizden aýyr júk túskendeı jeńildenip sala berdik. Endi Elmıra men Danelıanyń Rıo-de-Janeırodan oralýyn taǵatsyzdana kútip otyrmyz. – Elmıra túsinikti. Danelıa kim? – Týǵan sińlisi. Qaraǵandyda birge turady. Ápkemniń tileýshisi bolamyn dep, erip ketken. Birinshi bolyp «súıinshilegen» de sol. El­mıranyń alǵashqy jattyq­tyrýshysy – ákesi. Kúres­tiń álip­pesin úıretip, qyr-syryna baýlyǵan. Sport mektebinde Vla­dımır Staro­selskıı baptasa, qazirgi jattyqtyrýshysy – Vladıslav Sýtormın. Bir basyna jeterlik ataq-dańqyn Ánýarbek sanamalap shyqty. – Byltyr ótken «Mongolian Open-2015» halyqaralyq týr­nıri esimde jattalyp qalypty. Ýlan-Bator tórinde qyzymyz qarsylas shydatpady. Aqtyq aı­qasta AQSh-tan kelgen Beı­jiń Olımpıadasynyń júl­degeri Rendı Mıllerdiń mysyn basty. Astana qalasynda uıym­dastyrylǵan Azııa chempıonatynda vetnam, koreı, ózbek balýandaryn qoǵadaı japyrdy. Fınalda úndilik sportshyny 8:1esebimen oısyrata utyp, Rıo joldamasyna ıe boldy, – deı­di qyzynyń Olımp shyńyna jetý­degi jeńisti joldary jaıly ákesi. Qazaq qyzdarynyń Olımpıa­dadaǵy alǵashqy medali izbasar­laryna juǵysty bolǵaı! О́mir ESQALI, «Egemen Qazaqstan» Soltústik Qazaqstan oblysy