Dúnıe dıdaryndaǵy Darıǵa

qazaq qyzdary arasynan Olımpıadanyń tuǵyryna kóterilgen tuńǵysh boksshy atandy. Jaǵymdy jańalyq jetken boıda biz Petropavl sport saraıynda bokstan aǵa bapker bolyp isteıtin alǵashqy ustazy Sabyrjan Saqtaǵanovqa jolyqtyq. – Oblys ortalyǵynan shetke­rileý ornalasqan Zarechnyı shaǵyn aýdanyndaǵy №13 mektepte oqı­tyn Lııa Shaıdýllına degen oqýshy men jetekshilik etetin kıkboksıng úıirmesine qatysyp júrdi. Birde ol janyna bir qyzdy ertip ákeldi. «Mektepte ul balalarmen jıi shekisip qala beredi. Onyń bul qylyǵynan muǵalimder de sharshady. Siz múmkin kıkboksıngtiń qyr-syryna úıretersiz», dep qıyla ótindi. Bul 2003 jyl bolatyn. Obaly ne kerek, jarty jyldyń ishinde dene-bitimi taralyp, symdaı tartylyp shyǵa keldi. Kelesi jyly oblystyq chempıonatta qarsylas shydatpady. 16 jasynda Qazaqstan birinshiligine qatysyp, ekinshi oryn aldy. – Al boksqa qashan aýysty? – Meniń úıirmemde jattyǵatyn on qyz bala bul kezde qomaqty tabystarǵa qol jetkize bastaǵan. Umytpasam, 2005 jyly bolý kerek, barlyq qyzdar jattyqtyrýshy Serik Bekturǵanovtyń qaramaǵyna aýysty. Bul birden-bir durys sheshim edi. О́ıtkeni, bul kezeńde elimiz boıynsha qyzdar boksy jandanyp, jeke jattyǵýlardyń qajettigi týǵan. Desek te, Darı­ǵanyń orny da, joly da bólek. Bul úshin onyń 64, 69, 75 kılo salmaq dárejeleri boıynsha elimizdiń 7 dúrkin chempıony bolǵanyn aıtsaq ta jetkilikti. Azııa tórinde 2 márte, Á.Moldaǵulovany, M.Mámetovany, H.Dospanovany eske alýǵa, S.Qonaqbaevtyń júldesine arnalǵan halyqaralyq týrnır­lerde jasyndaı jar­qyldady. Aıtpaqshy, halyqaralyq dárejedegi sport sheberi, 2015 jyl­dyń eń úzdik boks­shysy atanǵanyn aıta ketken jón. – Kil myqtylar jınalǵan Azııa chempıonatynda Olımpıada joldamasyn utyp alý ońaı bol­maǵan shyǵar? – Qaı boksshynyń bolsyn kókeıinde úlken jeńiske degen úmit bolary anyq. Darıǵa Qytaıdyń Ýlanchab qalasyna óz kúshine senip bardy. Bapkerlerdiń tapsyrmalaryn oıdaǵydaı oryndap, 75 kılo salmaq dárejesinde qorjynǵa jalǵyz «altyndy» saldy. Fınalda qytaılyq Lı Kıýandy 3:0 ese­bimen jeńip, ekinshi ret «sary qurlyqtyń» chempıony tájin kıdi. Sóıtip, Olımpıada lısenzııasyn jeńip aldy. – Endi muhıttyń arǵy ja­ǵyn­da dúbirletken jazǵy Olım­pııa­lyq oıyndarǵa toqtalsaq. Darıǵanyń ónerine qandaı baǵa berer edińiz? Alǵashqy kezdesýinde eki márte álem chempıony, kanadalyq Arıan Fortınmen judyryqtasýy naǵyz babynda ekenin kórsetti. Asa tar­­tysty básekede 2:1 esebimen utty. Shırek fınalda marokkolyq Hadıd­ja Mardıdi 3:0 esebimen jeńip, barlyq raýndtarda mereıi ústem boldy. Jartylaı fınalda London Olımpıadasynyń, álemniń eki dúrkin jeńimpazy AQSh boksshysy Klaressa Shıldspen qolǵap túıistirdi. Jan alyp, jan berisken bul oıynǵa men jeńiske para-par jeńilis boldy degen baǵa berer edim. Sondyqtan dúnıe dıdaryna tanylǵan Darıǵanyń qazaq qyz­dary arasynda tuńǵysh ret Olımp shyńyna kóterilip, qola medal utyp alýy bizdiń sport tarıhyndaǵy jarqyn beles ekeni talassyz. Áńgimelesken О́mir ESQALI, «Egemen Qazaqstan» Soltústik Qazaqstan oblysy