Almatyda 28-shi Dúnıejúzilik 2017 jylǵy qysqy Ýnıversıadaǵa daıyndyq jóninen uıymdastyrý komıtetiniń kezekti májilisi ótti.
Májilisti Ýnıversıadany uıymdastyrý komıtetiniń tóraıymy Darıǵa Nazarbaeva júrgizdi. Qala ákimi Baýyrjan Baıbek Ýnıversıadaǵa daıyndyq kestesiniń belgilengen merzimniń aldynda keletinin, oǵan dálel – kúni búginge deıin qurylys nysandarynyń 90 paıyzdan astamy salynyp bitkenin tilge tıek etti.
О́z kezeginde atqarylyp jatqan sharalarǵa qatysty vıse-premer jan-jaqty baǵa bere kelip, birqatar syndar aıtty. Áńgime barysynda Darıǵa Nazarbaeva «Suńqar» shańǵy keshenindegi oralymsyzdyqtarǵa arnaıy toqtaldy. Osyǵan oraı qala ákimi Baýyrjan Baıbek vıse-premerge atalǵan keshendegi oıyndar kestesi tolyq «Tabaǵan» taý shańǵysy kýrortty aýmaǵyna kóshirilgeni týraly málimdedi. О́ıtkeni, bıylǵy jaz aıyndaǵy toqtaýsyz jaýǵan nóser «Suńqar» sport kesheniniń aýmaǵynda shyn máninde de 17 jerden zalal keltirdi.
Soǵan qaramastan, Almatydaǵy negizgi muz saraılary men aıdyndary, sport qalashyqtary búgingi tańda álemniń sport juldyzdaryn qarsy alýǵa saqadaı saı.
28-shi Dúnıejúzilik qysqy Ýnıversıada Almatyda 2017 jyldyń 29 qańtary men 8 aqpany aralyǵynda ótedi. Álemdik dodaǵa dúnıe júziniń 64 elinen 2000-nan astam sportshy qatysady. Onyń ústine, barlyǵy Almatyǵa sol tusta qazirgi esep boıynsha 30 myńnan astam sheteldik qonaqtar men týrıster keledi. Olarǵa 3000 volonter qyzmet kórsetedi. Álemdik dodada 12 sport túrinen barlyǵy 86 medal jıyntyǵy sarapqa salynady.
Uıymdastyrý komıtetinde qazaq sportshylarynyń sport kıiminiń úlgileri, Ýnıversıada tumary men júldegerlerge beriletin medal túri kórsetildi. 2017 jyldyń 25 qańtarynda start alatyn sport oıyndarynyń alaýy Astana men Almaty qalalarynda, respýblıkanyń barlyq 19 joǵary oqý oryndarynda bir mezette tutanady. Alaý kótergen stýdent jastar quramasynyń joly Ýnıversıadanyń saltanatty ashylý sátinde túıisedi. Taǵy bir eskererlik jaıt, rejısserlik qoıylymdy qazaqstandyq mamandar jasaıdy. Uıymdastyrý komıteti sheteldik mamandar men «juldyzdardy» jappaı shaqyrýdan bas tartyp otyr. «Mamandar da, juldyzdar da ózimizdiń elimizden de tabylady» degen uıǵarymǵa kelgen uıymdastyrý komıteti osymen kezekti májilisin aıaqtady.
Talǵat SÚIINBAI,
«Egemen Qazaqstan»
ALMATY
