Qarý urlaǵan qanisherler ustaldy

2009 jyldyń 17 qyrkúıeginde belgisiz bir top adam «Suńqar» ańshylyq dúkenine shabýyl jasap, kóptegen qarý, onyń ishinde: karabın, vıntovka, pnevmatıkalyq tapansha, oq-dáriler, sondaı-aq, optıkalyq kózdeýishter, jaýyngerlik granatalardyń saqınalary men 4 dana rasııany jymqyryp ketken bolatyn. Sol kezde-aq bul oqıǵaǵa qatysty polısııa QK 255-bóliminiń 3-tarmaǵymen qylmystyq is qozǵaǵan edi. Alaıda, amal ne, qaptaǵan polıseıler qaýipti qylmyskerlerdi anyqtaý maqsatynda uzaq ýaqyt boıy arnaıy jedel-izdestirý sharalaryn júrgizse de qaraqshylar tabylmady. Sonan sergeldeńge túsken iz kesýshiler bizdiń ǵana emes, kórshi memleketterdegi qarý satýmen aınalysatyn dúkenderdi qarap, sondaı-aq, buryn qarý qoldanýmen sottalǵan adamdardy muqııat tekseriske aldy. Biraq nátıje bola qoımady. Aqyry arada bir jyl ótkende álgi urlyqtyń qasireti kórindi, 2010 jyldyń 7 tamyzynda Kókshetaý qalasyndaǵy jeke kásiporynnyń eki kúzetshisi óltirilgen asa qatygezdik qylmys tirkeldi. Saraptamalar qorytyndysy kúzetshiler joǵaryda aıtylǵan «Suńqar» dúkeninen urlanǵan qarýlarmen atylǵanyn kórsetti. Bul oqıǵa boıynsha da taǵy da qylmystyq is qozǵaldy. Biraq ýaqyt syrǵyp jatty. Beıbit kúnde urlanǵan bir qoıma qarýdyń izine polısııa túse almady. Tek arada birneshe jyl ótken soń ǵana ústimizdegi jyldyń mamyr aıyn­da, Kókshetaý qalasynyń shetindegi qalyń butalar yǵynda eki adamnyń belgisiz qarýmen nysana atyp jatqany baıqalyp qaldy. Álgilerdi quryqtap teksere kelgende olardyń 2009 jáne 2010 jyldary joǵaryda atalǵan qylmystarǵa qatysy barlyǵy jáne munyń qalaı júzege asyrylǵany anyqtalyp shyǵa keldi. Mine, sóıtip, oıda-joqta umyt bola jazdaǵan qylmys ashyldy. Aqmola oblysy