«Biz qazaq mal baqqan elmiz, eshkimge soqtyqpaı jaı jatqan elmiz, basymyzdan qut-bereke qashpasyn dep, jerimizdiń shetin jaý baspasyn dep, naızaǵa úki taqqan elmiz. Eshbir dushpan basynbaǵan elmiz, basymyzdan sóz asyrmaǵan elmiz, dostyqty saqtaı bilgen elmiz, dám-tuzdy aqtaı bilgen elmiz», dep Qazybek bı babamyz atap ketkendeı, qazaq halqy sonaý Qazaq handyǵynyń irgesi qalanǵannan beri san qıly oqıǵalardy, aýmaly-tókpeli kezeńderdi bastan keshti. Táńirge táýbe, ata-babalarymyz ǵasyrlar boıy arman etken táýelsizdigimizdi alyp, el bolyp eńse túzedik. Qazaqstandyq el basqarý úlgisi, ekonomıkany kóterip, daǵdarystan alyp shyǵý tásili qaı elge bolsa da úlgi bolarlyqtaı. Qazirgi tańda Qazaqstan álemdik saıasatta, ekonomıkada, ózge de salalarda ózindik orny men aıbyndy kúshi bar memleketke aınaldy. Kóptegen halyqaralyq uıymdardyń múshesi. Táýelsizdik arqasynda qol jetkizgen jetistikterimiz jeterlik. Árbir qazaq eńsesin joǵary ustap, «Men qazaqpyn!» dep zor maqtanyshpen aıta alatyndaı jaǵdaıǵa jetti. Osynyń barlyǵy Konstıtýsııamyzdy qabyldap, memlekettigimizdi nyǵaıtýdyń arqasynda múmkin bolyp otyr. Ata Zańymyzdyń basty kózdeıtin nysany – adam jáne onyń ómiri, quqyqtary men bostandyqtary. Negizgi Zańymyz táýelsiz Qazaqstannyń qoǵamdyq jáne memlekettik qurylysynyń irgeli qaǵıdattaryn bekitip, demokratııalyq ınstıtýttardyń damýyna qýat berdi. Qoǵamdyq tatýlyq pen saıası turaqtylyq, búkil halyqtyń ıgiligin kózdeıtin ekonomıkalyq damý, qazaqstandyq patrıotızm jáne memleket ómiriniń asa mańyzdy máselelerin demokratııalyq ádistermen sheshý – respýblıka qyzmetiniń túbegeıli prınsıpteri bolyp bekitildi. Demek, qoryta aıtqanda, Konstıtýsııa – Qazaq jerinde ómir súretin barlyq halyq ókilderiniń birligine, teńdigine kepildik beretin, sondaı-aq barlyq bılik tarmaqtarynyń qyzmetine baǵyt berip otyratyn negizgi qujat. Elimiz ben qoǵam turaqtylyǵynyń, bolashaqqa degen senim men halqymyzdyń jaqsy turmysynyń, laıyqty ómiriniń kepili – Ata Zańymyzdyń mereıi ústem bola bersin!
Gúljan ÁJIǴALIEVA,
Aqtóbe oblystyq qylmystyq ister jónindegi mamandandyrylǵan aýdanaralyq sotynyń sýdıasy
