Qazaq karatesiniń qaýqary qandaı?

Jýyrda halyqaralyq olım­pıada komıteti karate sportyn Olım­pıada baǵdarlamasyna qosý týraly sheshim shyǵardy. Álemdik arenada bul sport túri boıynsha qaı elder kóshbasshy? Karateniń otany sanalatyn Japonııa astanasynda 2020 jyly ótetin Olımpııa oıyndarynda Qazaqstan quramasynyń olja salýǵa múmkindigi bar ma? Bul týraly osy salanyń mamandarynan suraǵan edik. Shattyq Qajymuqan, Azııa chempıonatynyń júldegeri, ha­lyq­aralyq dárejedegi tóreshi: – Azııa qurlyǵyndaǵy favorıtter – Japonııa men Iran. Álemdik dodalarda Fransııa, Italııa, Mysyr elderi úzdik sanalady. Biz Azııa chempıonattarynda alǵashqy úshtikke kirip júrmiz. Tokıoda ótken sońǵy chempıonatta komandalyq esepte Irannan ozyp, ekinshi orynǵa kóterildik. Qudaı qalasa, Olımpııalyq oıyndarynda medal alýǵa múmkin­digimiz bar dep oılaımyn. Qazirden bastap ázirlikti kúsheıtip, lısen­zııaǵa qol jetkizýge tyrysý kerek. Buryndary Azııa chempıonattarynda – Japonııa, Eýropa chempıonattarynda Fransııa júldeniń barlyǵyn alyp ketetin oqıǵalar bolǵan. Qazir olaı emes, karate keshendi túrde damyǵan elder kóbeıdi. Iаǵnı aldaǵy Tokıo Olımpıadasynda qandaı bir el aıqyn basymdyqqa ıe bolady dep oılamaımyn. Rınat Saǵyndyqov, Azııa chempıony, karateden ulttyq qurama múshesi: – О́zińiz bilesiz, buryn Kýba boks­shylary qarsylas shaq keltirmese, keıin boks basqa elderde de qarqyndy damyp ketti. Karate sportynda da dál sondaı jaǵdaı. Sebebi, karateni damytýǵa qajetti múmkindikter barlyq elderde bar. Ulttyq quramalar bir-biriniń jat­tyǵý jıyndaryna baryp, tájirıbe almasady. О́z eliniń ǵana emes, basqa elderdiń de sportshylarymen sparrıngke túsedi. Men 67 kıloda óner kórse­temin, bul kategorııa­da Iran, Mysyr, Fransııa sportshylary myqty. Basqa salmaqtarda da sol sııaqty. Menińshe, Olımpıadada bá­sekelestik óte joǵary bolady. Degenmen, Qazaqstannyń medal alýǵa tolyq múmkindigi bar. Sebebi, bizde karateni ári qaraı damytatyn baza jetkilikti. Tokıo Olımpıadasyna deıin jas­tar rezervin durys jolǵa qoısaq, álemdik arenada turaqty nátıjeler bolyp turady dep oılaımyn. Arnur ASQAROV, «Egemen Qazaqstan»