Balandın – «Qazaq felpsi»

Búkil Brazılııany bir mezette tań qaldyrǵan jeńisinen keıin mamandar men sport sholýshylary Dmıtrıı Balandındi biraýyzdan «Qazaq Felpsi» dep atap ketti. Oǵan sebep 21 jastaǵy ulannyń Rıoda 200 metrge brass ádisimen júzý ádisindegi sensasııalyq kórsetkishi bolsa kerek. Degenmen, almatylyq júzgish Oıyndarǵa quralaqan kelmegen. 2014 jyly Ońtústik Koreıada ótken jazǵy Azııa oıyndarynda 50, 100, 200 metrdi braspen júzýde úsh «altyndy» qatar alǵan ol – 2015 jyly Kvandjýda ótken jazǵy Ýnıversıadada 100 metrge bras­pen júzýde bir altyn medalǵa qol jetkizgen. Biraq, kelgennen keıin Sankt-Peterbýrgte bolǵan halyqaralyq jarysta 100 metrge braspen júzýde ekinshi oryn alyp qaldy. Al 200 metrlik jarysta úshinshi orynǵa taban tiredi. Halyqaralyq tóreshilerdiń qataldyǵy sondaı, Azııa qurlyǵyndaǵy taıtalas­ta 4 altyn alǵan júzgishti 50 metrlik qashyqtyqta «tártip buzǵany» úshin jarystan shyǵaryp tastady. Dımanyń bar kinási jarys jolynda basseın erneýinen keri qaıtar kezinde erejege saı ońtaıly burylmaǵany eken. Osydan keıin jankúıerler oılanyp qaldy. Sol qobaljýdy Dıma Rıoda serpiltti. Alaıda, alǵashqy taıtalastaǵy 8-shi orny taǵy oılandyryp tastaǵan. Al fınalda janyn saldy. Bul rette onyń segizinshi jolaqta júzgeni de durys bolǵan sııaqty. Eshkimniń nazaryn aýdara qoımaıtyn bul beldeýde jarysý oǵan biraz artyqshylyq alyp bergendeı. Sonymen, Dmıtrıı Balandın nebári 3 mınýttyń ishinde Rıo-2016 Olımpıadasynyń altyn medalin ıelendi. Sensasııalyq kórsetkishke (2:08,20) qol jetkizdi! Qazaqstan sportshysy 2015 jylǵy álem chempıony Marko Koh pen vıse-chempıon Kevın Kordesti tipti júldesiz qaldyrdy! Almatynyń «altyn balasyn» qala ákimi Baýyrjan Baıbek bas bolyp tańsáride Almatyǵa kelip qonǵan halyqaralyq baǵyttaǵy avıalaınerden tosyp aldy. Qazaqstannyń sport tarıhyndaǵy júzýden tuńǵysh Olımpıada chempıonyna laıyqty qurmet kórsetildi. Al bul kezde naǵyz Felps, ıaǵnı amerıkalyq júzgish Maıkl Felps Rıoda Olımpııa oıyndarynyń 23 ret chempıo­ny (!) ataǵyn alyp, marqaıyp otyrǵan. Mundaı oqıǵa Olımpıada tarıhynda bolmaǵan! Dıma – 21 jasta, Maıkl – 31 jas­ta. Maıkl de sportta talaı súringen, biraq ornynan tez turǵan. Ol «qazaq Felpsine» sabaq bolary sózsiz. Medal jaǵyna kelsek, bul Felps Afınada, 19-ǵa qaraǵan jasynda Olımpıadanyń 6 altyn medalin jeńip alǵan. Qazir Dımada Olımpıadanyń sońǵy altynyn qosqanda, 5 altyn medal bar. Sońǵy derek: Felpstiń boıy – 1,93 metr, salmaǵy – 88 kg, qos qulashynyń jazylǵandaǵy uzyndyǵy – 201 sm. Dmıtrıı Balandın kórsetkishteriniń osy ólshemderge sáıkes kelip turǵanyn qarańyzshy. Aıtpaqshy, Dımanyń Rıoda ózine jankúıerlik etip qaıtqan anasy Tatıana – konkımen syrǵanaýdan sport sheberi. Ákesi – Igor Balandın de sporttan alshaq júrgen jan emes. Almatyda voleıbol oıynynyń túbin túsirgenderdiń birinen sanalady. Chempıonnyń otbasy osyndaı! Talǵat SÚIINBAI, «Egemen Qazaqstan» ALMATY