Jaqaev dástúrin jańǵyrtady

 Qazaqstan Táýelsizdiginiń 25 jyldyq mereıtoıy aıasynda Syr óńiri jurtshylyǵy dańǵaıyr dıqan, eki márte Sosıalıstik Eńbek Eri Ybyraı Jaqaevtyń 125 jyldyǵyn keń kólemde atap ótkeli otyr. Bul Elbasynyń «Jalpyǵa Ortaq Eńbek Qoǵamyna qaraı 20 qadam» atty mańyzdy qujatynan týyndaıtyn el azamattaryn adal eńbek pen Otanǵa degen súıispenshiligin arttyra túsetin, birlik pen yntymaqqa shaqyratyn aıtýly oqıǵa bolmaq. Naqty kezeńde dúbirli toıǵa daıyndyq úlken qarqynmen júrgizilip jatyr. Osy oraıda Shıeli kenti men Ybyraı ata ómir súrip, eńbek etken burynǵy Qyzyltý ataýyndaǵy aýyly qaıta jańǵyrtylady. Eń bastysy, Y.Jaqaev atyndaǵy kúrish ósirý tarıhy murajaıynyń jańa ǵımaraty sol aýyldan burynǵy ornyna qaıta turǵyzylady. Bul aýyldyń sáýletine kórik qosatyn tamasha ǵımarat bolǵaly tur. Árıne, bul eldiń toıy, jurttyń eńsesin bıiktetip, birligin kórsetetin, Memleket basshysynyń «Máńgilik El» ıdeıa­syn júzege asyratyn kópshilik­tiń yqylasyn arttyratyn toı bolýy tıis. Naqty kezeńde aýdan orta­ly­­ǵyndaǵy ortalyq – Musta­fa Shoqaı alańy qaıta jańǵyr­ty­lýda, Budabaı atyndaǵy ortalyq mádenıet úıi 43 mln teń­gege kúrdeli jóndeýden ótkizi­lýde. Bul jumysty «Pres­tol» JShS júzege asyrsa,  Alǵabas, Aqmaıa jáne Bala bı aýyldaryndaǵy aýyldyq mádenıet úıleri men klýbtary da jańasha keıipke engizilmek. Bul úshin jergilikti bıýdjetten jalpy 113 mln teńge qarjy qarastyrylǵan eken. – «Jaqsydan – sharapat» degen halqymyzdyń sózi bar ǵoı, el Táýelsizdiginiń 25 jyldyǵy jáne ataqty dıqan atamyz Ybyraı Jaqaevtyń 125 jyldyǵynyń mereıli merekesi aýdan jurt­shylyǵyna erekshe serpilis berdi. Atalmysh toıdy  laıyqty tabys­tarmen qarsy alý barysynda shetki eldi meken turǵyndary uıymshyldyq tanytyp otyr. Bul halyqtyń ortaq iske degen belsendiligin jáne aldaǵy kúnderge degen úlken senimin bildiredi, – deıdi uıymdastyrý jumysynyń bel ortasynda júrgen aýdan ákiminiń orynbasary Almasbek Esmahanov. Shıeli – oblysymyzdaǵy kó­rikti de kókoraıly jer. Buryn­ǵy ásem ǵımarattar qataryn sońǵy jyldary taǵy bir ádemi oryn tolyqtyrdy. Ol – Ybyraı Jaqaev atyndaǵy saıabaq. 2011 jyly bastalǵan bul istiń basynda baǵbandyqtyń mamany, ardager aǵamyz Perdáli Arhabaev júrdi. Bul kúnderi 10 gektar saıabaqta 10 myń túpten astam túrli saıaly aǵash ósip tur. Ásem bir kórinis, jańǵa jaıly meken. Ortada qara ketpendi qulashtaı soǵyp, jer qyrtysyn aýdarǵan qara shal – Ybyraı atamyzdyń eskertkishi tur. – Saıabaǵymyz naǵyz demalys ornyna aınalyp keledi. Aýdan basshylyǵynda bolǵan jigitterdiń qaı-qaısysynyń da Shıeliniń kóriktenýine qosqan ózindik úlesteri bar. Mereıli mereke qarsańynda parktiń tas tósenishteri aýystyrylyp jatyr. Sol sekildi basseın men sýburqaq qaıta jańǵyrtylyp, kópshiliktiń mádenı demalysyna, balalardyń asyr sala oınaýyna jaǵdaı jasalady. Basqa da túrli attraksıondar qoıý jos­parda bar, deıdi ardager baǵban, osy saıabaqty uıymdastyrýshy Perdáli aǵamyz óz sózinde. Dese degendeı, saıabaqtaǵy aǵashtar men gúlderdi kútýmen, tazalyǵy men basqa da sharýalarymen 10 adam kúndelikti shuǵyldanýda. Iаǵnı, aýdan ortalyǵyndaǵy mádenı oryn Y.Jaqaev atyndaǵy saıabaqtyń kórkine kórik qosylyp, jaınaı túsýi úshin tolyqqandy jumystar atqarylýda. Nurmahan ELTAI Qyzylorda oblysy, Shıeli aýdany