Sertine berik seriktestik

Úsh- tórt jyl qatarynan bolǵan qýańshylyq óńir dıqandarynyń kóńilderin shaılyqtyryp tastap edi. Alaıda, ár kóktemge úkili úmit artatyn sharýa qaýymy bıyl da áldeqalaı bolar eken degen kúpti kóńilmen dán sepken-di. Jań­byrly jaz olardyń boıynda úmit otyn jaqqandaı bolǵan. Úmit aqtaldy, kóktemde tuqym sepken alqap­tarda jaıqalǵan  egin shyqty. Qazir ońtústik aýdandar­da egin oraǵy bastalyp ta ketti. Mine, alǵashqylardyń qataryn­da altyn dándi alqapqa oraq salǵan­dardyń biri – «Qobda- Jer» jaýap­kershiligi shekteýli seriktes­tigi. Bul aýdandaǵy iri aýylsharýa­shy­lyq qurylym bolyp tabylady. Jalpy, eginshiliktiń táýekel aımaǵynda ornalasqan bul óńirde negizinen mal sharýashylyǵyna basymdyq beriledi. Bul seriktestik senimdi serik etip jyl sa­ıyn egin salyp júr. Eginshilik tehnologııasyn saqtaǵandyqtan bolar, qýańshylyq jyldary da jerge qarap qalǵan emes, az da bolsa ónim alyp keledi. – Bıyl 1900 gektarǵa jýyq alqapqa egis salǵanbyz. Onyń 1673 gektary bıdaı, qalǵany arpa. Alǵashqyda kúzdik arpaǵa oraq túsirdik. Odan shamamen gektarynan 15 sentnerden ónim aldyq. Qazir bıdaıdyń dáni tolysyp, jaıqalyp tur. Bul alqaptarda gektar túsimdiligi osy shamada  bolady degen úmitimiz bar. Qazir úsh tirkemeli «KamAZ» astyq tasymaldaýda.  Jaqynda taǵy bir kombaın jáne «KamAZ» avtokóligin  shyǵarýdy kózdep otyrmyz. Basty maqsat – aýa raıynyń ashyq-tyǵynda egindi tolyq qambaǵa quıyp alý, – deıdi «Qobda-Jer» JShS ınjeneri Jolaman Mokın. Eginshilerdiń bir alqaptan ekin­shi alqapqa qonys aýdarýyna dala qosyndaǵy eki dóńgelekti vagon da tıimdi bolyp tur. Onyń bireýinde eginshiler demalsa, ekinshisi ashana retinde paıdalanylady. – Seriktestiktiń óz elevatory, dıirmeni jáne «Aqjol» atty naý­baıhanasy bar. Qazir astyqty osy elevatorǵa quıyp jatyrmyz. Artyǵyn «Ramazan» JShS-na tapsyramyz. Bıyl bıdaıdan qor jasaýdyń sáti túsip tur. Eginshilikpen aınalysqannyń arqasynda óz dıirmenimizden shyqqan unnan nan pisirip, onyń bir bólkesi ózimizge qaraıtyn úsh dúkende nebári 50 teńgeden  satylýda. Qazir kúnine 700-800 bólke nan pisiriledi. Munda 6 adam eńbek etedi, – deıdi «Qobda-Jer» JShS dırektorynyń orynbasary Shynar Ýlıanova rıza kóńilmen. Otyz shaqyrymǵa jýyq jerdegi egin alqaptarynan tasymaldanyp jatqan astyq kerýeninde tolas joq. Seriktestik dıqandary el yrysyn jaýyn-shashynǵa uryn­dyrmaı tez arada jınap alýǵa ju­mylýda. Olar ýaqytpen sanaspaı eńbek etýdiń úlgisin kórsetýde. Satybaldy SÁÝIRBAI, «Egemen Qazaqstan» Aqtóbe oblysy, Qobda aýdany