Babalar báıgesinde belin býǵan

Erteń Qyrǵyzstanda Kóshpelilerdiń búkilálemdik II oıyndary bastalady Kórshi qyrǵyz eliniń Ystyqkól óńirinde qyrkúıektiń 3-i kúni sóreden shyǵatyn Oıyndar 8-inde márege jetedi. Sol eki aralyqta jer júziniń 53 elinen jınalatyn 1000-ǵa jýyq sportshy kóshpeliler saıystarynyń 23 túri boıynsha kúsh synasyp, 400 myń AQSh dollaryn quraıtyn júlde qoryn sarapqa salady. Bul saıystardyń arasynda ártúrli qashyqtyqtarǵa belgilengen báıgeler, kókpar, aýdaryspaq, ulttyq ańshylyq óneri, sadaq atý jáne dástúrli zerektik oıyndary bar. «Kóshpelilerdiń búkilálemdik oıyndary» dep atalatyn bul ala­mannyń ómirge kel­genine kóp bola qoıǵan joq. Ol budan bar-joǵy eki jyl buryn, týra osy ýaqyt shamasynda qyrǵyz aǵaıyndardyń bastamashyldyǵymen alǵash ret qolǵa alyndy. Sol joly, 2014 jyldyń 9-15 qyrkúıek kúnderi atalmysh Oıyndar Ystyqkól oblysynyń ortalyǵy – Cholpon-Ata qalasynda birinshi márte jalaý jelbiretti. Tuńǵysh ret ótip otyrǵanyna qaramastan, oǵan álemniń Avstrııa, AQSh, Aýǵanstan, Ázerbaıjan, Be­larýs, Brazılııa, Germanııa, Qazaqstan, Qyrǵyzstan, Lıtva, Mońǵolııa, Ońtústik Koreıa, О́zbekstan, Reseı, Tájikstan, Túrikmenstan, Túrkııa, Fransııa jáne Shvesııa sııaqty 19 elinen 583 sportshy qatysty. Asa tartysty da qyzyqty ótken báseke qorytyndysynda 12 altyn, 8 kúmis jáne 8 qola, barlyǵy 28 medaldi qorjynǵa túsirgen Qazaqstan quramasy komandalyq esepte ekinshi orynǵa taban tiredi. Bas báıgeni olardan sál alda bolǵan alań ıeleri – Qyrǵyzstan sportshyla­ry jeńip aldy. Buǵan qarsylastardyń saıysqa eki qurammen qatysqandary tikeleı áser etti. Al bizdiń sańlaqtar tartys ústinde qol jetkizgen 12 altyn medaldyń 6-ýyn – qazaq kúresinen, 3-ýin – toǵyz korgooldan, 2-ýin – qyrǵyz kúresinen jáne 1-ýin 2400 metrlik at jarysynan túsirdi. Qazaqstan sportshylary bul jolǵy Oıyndardan da aıtar­lyqtaı kóp jeńister kútedi. Ja­rysta elimizdiń namysyn ult­tyq sport túriniń 75 tarlany qor­ǵaıdy. Olar burnaǵy kúni Ystyq­kól jaǵalaýyna júrip ketti. – Bizdiń delegasııa quramynda barlyǵy 129 adam bar. Olardyń qataryn sportshylardan bólek, jattyqtyrýshylar men federasııa ókilderi túzedi, – deıdi delegasııa jetekshisi Marat Qoı­­shybaev. – Al respýblıka atynan saıysqa túsetin sport­shylardy eńbek sińirgen sport sheberleri, halyqaralyq sport sheberleri jáne ártúrli halyq­aralyq týrnırlerdiń jeńim­pazdary quraıdy. Biz Oıyndar baǵdarlamasyndaǵy 23 sport tú­riniń 21-i boıynsha jarys jolyna shyǵamyz. Quramymyz myqty. Sondyqtan alǵashqy úshtiktiń qatarynan tabylýdy alǵa maqsat etip qoıyp otyrmyz. Oıyndardyń ashylý saltanaty 3 qyrkúıek kúni keshke Cholpon-Ata qalasyndaǵy ıppodromda ótedi. Uıymdastyrýshylar onda kaskaderlerdiń, etnofolklorlyq mýzyka jáne bı toptarynyń qaty­sýlarymen orasan zor shoý ótkeli turǵanyn aıtady. Jarystyń kelesi kúni «Kyrchyn» shatqalynda etnofestıval ashylady. Osy jerde «Qyrǵyz aıyly» kıiz úıler qalashyǵy boı kóteredi. Ol 5 kún boıyna kelýshilerge te­gin qyzmet kórsetip, kóshpeli ómir saltynyń san qyrlarymen tanystyrady. Al 53 memlekettiń myńǵa jýyq ókilderi qatysqaly turǵan bul jolǵy Oıyndardyń burynǵydan da tartysty bolatyn túri bar. Serik PIRNAZAR, «Egemen Qazaqstan»