Táýelsizdiktiń 25 jyldyǵyna 25 mektep

Ońtústik Qazaqstan oblysy adam resýrsyna baı aımaq. Jyl saıyn mektep tabaldyryǵyn 70 myńnan astam búldirshin attaıdy. Osyǵan oraı memleket tarapynan jańa bilim oshaqtaryn salýǵa erekshe mán beriledi. Bıylǵy jańa oqý jylynda oblysta elimizdiń Táýelsizdiginiń 25 jyldyǵyna oraı 25 jańa mektep paıdalanýǵa berildi. Jyl saıyn jıyrmadan astam mektepter paıdalanýǵa berilse de adamǵa baı Ońtústikte úsh aýysymdy mektepter áli bar. Sondyqtan, 7 mektep úsh aýysymdy mektepterdiń sanyn azaıtsa, 6 oqý orny yńǵaılastyrylǵan ǵımarattardyń ornyn aýystyrdy. Al qalǵan mektepter oqý orny joq aýyldardan ashyldy. Eńbektiń eń úlkeni – bilim. Jahandaný barysynda biz bilim sapasyna erekshe kóńil bólýimiz kerek. Sonda ǵana básekege qabiletti el bolamyz. Bıyl 73 myńnan asa birinshi synyp oqýshylary alǵash ret mektep tabaldyryǵyn attady. Bul ótken jylmen salystyrǵanda, tórt myńǵa jýyq balaǵa kóbeıgen. «Yntymaq» shaǵyn aýylyndaǵy jańa mektep 900 oryndyq. Úsh qabatty bilim oshaǵynda jıyrma toǵyz oqý kabıneti, laboratorııalyq ortalyqtar men oqý, májilis zaly jáne kitaphanasy bar. Buǵan qosa aıtarymyz, jyl basynan beri Ońtústik Qazaqstanda 67 bilim nysanynyń qurylysy júrgizilse, búginge deıin sonyń 34 mektebi men 4 balabaqshasy el ıgiligine berildi. Baqtııar TAIJAN, «Egemen Qazaqstan» Ońtústik Qazaqstan oblysy