Múgedek arbasynda otyryp bıleýden álem kýbogi Sankt-Peterbýrgte ótti. Oǵan Reseıdiń ózinen 200-den asa sportshy qatysty, sonymen qatar, talapkerler Qazaqstan, Avstrııa, Belgııa, Gongkong, Italııa, Fılıandııa jáne Japonııa elderinen keldi.
Qazaqstan qurama komandasy álem kýbogine qostanaılyq Málıke Muqtarovany, Tarazdan Narǵyz Ahmetovany jáne Qaraǵandydan Aıgúl Balmaǵambetovany usynǵan. Osy jarysta Málıke qola júldemen oraldy.
Jarys bıdiń ansambl, kombı, kombı standart, kombı latına, kombı frıstaıl, dýo, dýolatına, dýo frıstaıl, sıngl, sıngl frıstaıl degen on atalymy boıynsha ótti. Al Málıke frıstaıl atalymynda qola júldeger atandy jáne jarystyń «Chempıondar shoýy» atty fınalyna qatysý qurmetine ıe boldy.
«Málıke ándi jaqsy aıtady. Ony biz osydan alty jyl buryn bıge shaqyrǵan edik, ol jattyǵýlarǵa qalmaı kelip júrdi. Respýblıkada ótken jarystarǵa ertip bardyq. Endi , mine úmittiń bárin aqtap, álem kýboginde qola júldege qol jetkizdi», – deıdi kolıaskadaǵy bıdiń Qostanaıda negizin salýshy jáne «Úmit-Nadejda» qoǵamdyq birlestigi tóraǵasynyń orynbasary Arýna Jaqsyǵulova. Qazir Málıke oblys ortalyǵyndaǵy №9 mekteptiń 10 synybynda oqıdy.
«Mundaı úlken jarystarda jeńiske jetý ońaı emes. Shetelderden kelgen bıshilerdiń arbalary bizdegige qaraǵanda óte jetildirilgen, ol sportshy múmkindigin ústemeleı túsedi», – deıdi Málıke Muqtarova.
Bıyl qarasha aıynda Qytaıda Azııa chempıonaty ótedi. Málıkeniń joldamasy daıar bolǵanymen oǵan qarjy tabylsa ǵana barady.
Názıra Járimbetova
QOSTANAI
