Ǵasyrlardan syr shertken Atyraý (foto)

Elordadaǵy Beıbitshilik jáne kelisim saraıynda Atyraý oblysynyń elordadaǵy kúnderi aıasynda «Ǵasyrlardan syr shertken Atyraý» degen taqyryppen Atyraý oblystyq tarıhı-ólketaný mýzeıi kórme uıymdastyrdy. Atalǵan kórmege orta ǵasyrlyq Saraıshyq qalashyǵynan tabylǵan arheologııalyq buıymdar, tarıhı tulǵalardyń muraǵattyq qujattary men jeke zattaı jádigerleri shyǵarylady. Etnografııalyq turmystyq buıymdar, qolóner sheberleriniń týyndylary, aǵash ydystar, zergerlik áshekeı buıymdary jurtshylyq nazaryna usynyldy. Arheologııalyq buıymdardyń arasynda ásirese kúmisten jasalǵan áshekeıler men belbeýler, etnografııalyq turmystyq buıymdar erekshe kózge tústi. Atyraý qazaq tarıhyna, mádenıeti men ádebıetine óshpesteı iz qaldyrǵan, muralary júzjyldyqtarmen ólshenetin, eńbekteri el esinde máńgi qalǵan tarıhı tulǵalardy shyǵarǵan qasıetti meken. Kórme barysynda Edil-Jaıyq perzenti, Mysyr elin 17 jyl bılegen dańqty Beıbarys sultannan bastap kishi júzdiń hany Ábilhaıyr, Ishki Ordanyń negizin qalaýshy Bókeı han, Bókeı Ordasynyń sońǵy bıleýshisi Jáńgir han jaıynda málimetter alǵa tartyldy. Sondaı-aq, Mahambet О́temisuly, Isataı Taımanuly, Syrym Datuly syndy jaýjúrek batyrlar men Qurmanǵazy Saǵyrbaıuly, Dına Nurpeıisova sııaqty ısi qazaqqa máshhúr kúıshiler jaıly málimetter, odan berirek HH ǵasyr tarıh sahnasyna shyǵarǵan aqyn-jazýshylar men ǵalymdar, kúıshiler men ártister jaıly málimetter de kórmeden oryn aldy. Olardyń arasynda Ábý Sársenbaev, Hamıt Erǵalıev, Taýman Amandosov, Zeınolla Qabdolov, Jumeken Nájimedenov, Ábish Kekilbaev, Farıza Ońǵarsynova, Nurmahan Jantórın, Qarshyǵa Ahmedıarovtaı tulǵalar bar. Kórme sońy Atyraý oblysynyń óner sheberleri qatysqan gala-konsertpen qorytyndylandy. Aıgúl SEIILOVA Foto: Orynbaı BALMURAT