Qazaqstan Prezıdenti Nursultan Nazarbaev Almaty qalasynyń 1000 jyldyǵyna arnalǵan saltanatty sharalarǵa keldi. Memleket basshysy jańa salynǵan «Almaty Arena» muz aıdynynyń ashylýyna qatysty. Muz aıdynda «Almatynyń 25 shyńy» atty saltanatty shara ótip jatyr dep habarlaıdy Egemen-aqparat.
«Almatynyń 1000 jyldyǵyn almatylyqtarmen birge Qazaqstan ǵana emes, búkil álemdik qaýymdastyq ta atap ótýde. Bul tarıhı data IýNESKO-nyń mereıtoılyq datalar tizbesine endi. Osy sheshimnen Almatynyń aımaqtyq, jahandyq damýdaǵy aıryqsha róli kórinip otyr. Alataý bókterindegi qasıetti meken óziniń úlken tarıhynda talaı oqıǵalarǵa kýá boldy. Bul jermen Uly Jibek joly ótti. Ol Shyǵys pen Batysty, Soltústik pen Ońtústikti, ulanǵaıyr Eýrazııany jalǵaǵan alǵashqy búkil adamzattyq saýda joly edi. Budan 550 jyl buryn búkil Jetisý jeri Qazaq handyǵynyń altyn besigi boldy.
HH ǵasyrda da Almaty erekshe ról atqardy. 1929 jyly ol Qazaqstan astanasy boldy. Birtindep mıllıon turǵyny bar megapolıske aınaldy. Almaty egemen, táýelsiz Qazaqstannyń alǵashqy astanasy mártebesine ıe boldy. Sol sebepti de qalanyń 1000 jyldyǵyn el bolyp Otanymyz táýelsizdiginiń 25 jyldyq mereıtoıymen qatar toılap jatqanymyz sımvoldyq máni bar nárse», dedi Nursultan Nazarbaev.
«Almaty Arena» Ortalyq Azııada teńdesi joq keshen, ol jalpy álem boıynsha tehnıkalyq turǵydan úzdik jabdyqtalǵan aıdyndar qatarynda. Keshen úsh bloktan turady: muz aıdyny, jattyǵý aıdyny jáne júzý basseıni. Muz aıdyny 12 myń orynǵa eseptelgen, munda qysqy Ýnıversıadanyń ashylý jáne jabylý saltanaty, sondaı-aq short-trek konkımen júgirý, mánerlep syrǵanaý jáne hokkeı jarystary ótedi.
Búgin Elbasy Atletıkalyq aýyl atty obektini de aralap kórdi. Ol 5 myń sportshy men delegasııa músheleriniń turýyna laıyqtalǵan turǵyn úı kesheninen turady.
Almaty ákimi Baýyrjan Baıbek Elbasyǵa Ýnıversıada ótkennen keıin oǵan arnap salǵan keshenderdiń qalaı paıda asatyny týraly aıtty. Máselen, oıyndardan soń «Almaty Arena» sport mektepteriniń, kásibı jáne áýesqoı komandalardyń jattyǵatyn ornyna aınalady. Sonymen qatar ol adamdar syrǵanaq tebetin aıdyn retinde de paıdalanylady. О́ıtkni, keshen bastapqyda dene shynyqtyrýmen aınalysyp, salamatty ómir saltyn ustanǵysy keletin adamdar úshin salynǵan.
28-shi Dúnıejúzilik qysqy Ýnıversıada Almaty qalasynda 2017 jyldyń 28 qańtary men 8 aqpany aralyǵynda ótedi. Stýdentter oıynynda 55 memleketten 2 myńǵa jýyq sportshy qatysady dep kútilýde.
Ýnıversıada – Halyqaralyq Ýnıversıtettik Sport Federasııasynyń (FISU) uıymdastyrýymen stýdentter arasynda ótetin halyqaralyq jarys. Olımpıada oıyndarynan bir ereksheligi – jazǵy jáne qysqy ýnıversıada eki jyl saıyn ótkiziledi.
Ýnıversıada-2017 qysqy baǵdarlamasyna 13 sport túri endi: bıatlon, taý shańǵy sporty, kerlıng, konkı tebý sporty, shańǵy qossaıysy, shańǵy jarysy, tramplınnen shańǵymen sekirý jáne snoýbord. Sonymen qatar, Qazaqstan Respýblıkasynyń ótinishi boıynsha, qabyldaýshy el retinde, dopty hokkeıden jarystar engizilgen bolatyn.
Egemen-aqparat
