Til janashyrlary marapattaldy

Kenshiler astanasyndaǵy Dostyq úıinde oblys ákiminiń «Til janashyry» syılyǵymen marapattaý rásimi ótti. О́ńirde memlekettik tildiń kósegesin kó­gertý jolynda erinbeı eńbek etip júrgen laıyqtylar qatań irikteýden súrinbeı ótip, qarjysy qomaqty syıaqylarǵa ıe boldy. Baıqaý ótkizilgen bes jyldyń ishinde bul synǵa 185 úmitker qujat tapsyrǵan eken. Onyń ishinde 32 qatysýshy ozyp shyǵyp, ár jyldary laýreat ataǵyn ıemdengen. Al bıylǵy baıqaýda 28 úmitker baq synady. «Til janashyry» baıqaýynyń marapatyna oblys ákimi Nurmuhambet Ábdibekov qatysyp, sóz sóıledi. – Memlekettik til Táýel­sizdigimiz­diń negizi bolyp tabylady. Sondyqtan da onyń damýy – memlekettik saıasattyń asa mańyzdy quramdas bólshegi. Búgingi tańda elimizde til saıasaty baıypty jáne saýatty túrde júrgizilip keledi. Bul óte názik qural – ony dárigerdiń qolyndaǵy ótkirdeı asa saqtyqpen qoldanǵan jón, – dedi óńir basshysy. Bıylǵy marapattaý rásimi jańa­sha pishimde ótti. Uıymdastyrýshy­lar dóń­gelek ústel aınalasyna bıylǵy jáne ótken jyldardaǵy laýreattar men qoǵam qaıratkerlerin, bilim jáne ǵylym salasynyń ókilderin, memlekettik qyzmetkerler men oqýshylardyń basyn qosty. Sonymen, «Memlekettik til – mem­lekettik qyzmette» atalymy boıynsha oblystyq máslıhat apparatynyń aǵa ınspektory Amangeldi Júnisbek marapattaldy. «Til jarshysy» atalymynda júlde eki úmitkerge berildi. Onyń biri – «Prıozerskıı vestnık» gazetiniń tilshisi, ólkede onomastıka salasyndaǵy máselelerdi udaıy kóterip, osy taqyrypta qalam terbep júrgen Nur­ǵalı Qarabekov bolsa, ekinshisi – oblystyq  «Indýstrıalnaıa Karaganda» basylymy bas redaktorynyń orynbasary,  otyz jyldan astam ýaqyt qazaqtyń aqyn-jazýshylary men qoǵam jáne memleket qaıratkerleriniń shyǵarmashylyq murasyna sıkldyq materıaldar arnap kele jatqan Gúlnár Ysqaqova boldy. «Úzdik telehabar» atalymynda da eki birdeı úmitker syılyqqa laıyq dep tanyldy. «Qazaqstan-Qaraǵandy» tele­arnasynyń tilshisi, «Til taǵdyrym» baǵdarlamasynyń júrgizýshisi Botabek Maratuly men «Besinshi kanal» arna­syndaǵy «Qazaq tilin úıreneıik» baǵ­darlamasynyń avtory Aıjan Isa arnaıy júlde ıegerleri atandy. Al basty syılyq – «Til maıtalmany» atalymynyń jeńimpazy E.Bóketov atyndaǵy Qaraǵandy memlekettik ýnı­versıteti jýrnalıstıka bóliminiń oq­ytýshysy, professor Qoılybaı Asa­novqa buıyrdy. Jeńimpazǵa estelik músinshe men 500 myń teńgeniń sertıfıkaty tabys etildi. Qaırat ÁBILDINOV, «Egemen Qazaqstan» QARAǴANDY