Aýdandyq gazet, ahýalyń qalaı?

«Daýdyń basy – Daırabaıdyń kók sıyry» demekshi, aýdandyq gazet­terdiń jaı-jaǵ­daıy týraly máse­le bıyl seksen jyldyq mereı­toıyn toılaıtyn Almaty obly­sy­nyń Na­ryn­qol aýdan­dyq «Hantáńiri» gaze­ti­niń problema­synan bastalǵan edi. Gazet mereıtoıyn toılamaq túgili, jabylýdyń az-aq aldynda turǵan kórinedi. Kezinde klassık jazýshy Berdibek Soqpaqbaev, aqıyq aqyn Muqaǵalı Maqataev, Memlekettik syılyqtyń laýreaty, jazýshy Baqqoja Muqaı syndy qalamgerlerdiń shyǵarmashylyq shabytyn mazdatqan, qýat bergen aýdandyq gazettiń qazirgi hali múshkil. Bul jóninde respýblıkalyq «Altyn qalam» ádebı baıqaýynyń júldegeri Berkin Ákebaev dabyl qaǵady. «Hantáńiri» gazeti týraly problema «Egemenniń» menshikti tilshilerine basqa aýdandyq gazetterdiń ahýaly tóńireginde zertteý júrgizýge túrtki boldy. Basylym oqyrmanynyń maqalasyna qosa, búgin eki aımaqtan jazylǵan saraptamany oqyrman nazaryna usynyp otyrmyz.

Basshylar BAQ-ty baǵalaı bilse...

Torǵaı kentiniń qart turǵyny Jumaqan Sádýaqasov aqsaqal «Bizdiń Torǵaı» gazeti keshikse izdeı bastaıdy, redaksııaǵa qońyraý shalady nemese taıaǵyna súıenip ózi keledi. Ǵumyr boıy aýdandyq gazetti jazdyryp alatyn ol gazet keshikse bir zaty joǵalǵandaı mazasyzdana bas­taıdy. Gazetten týǵan jerdiń tarıhy, Torǵaı jerindegi kóz kórgen ıgi jaqsylar, halqynyń dástúri men salty, jastardyń tárbıesi týraly jyly maqala oqysa kádimgideı sergip qalady. «Aýdan ákimi ne bitirip jatyr eken, kim kelipti, kim qoıypty?» degen sıpattaǵy aqparattarǵa da eleńdeıdi. Redaktor Gúlim Smaǵul qart oqyrmanǵa gazettiń keshigý sebebi, ony jetkizetin «Qazposhta» qyzmetine baılanys­ty ekenin túsindirip, jyly sózimen shyǵaryp salady. «Bizdiń Torǵaı» gazetiniń redak­sııasyndaǵy býhgalterdi qospaǵanda redaktor, bir tilshi, betteýshi jáne hatshy bal jınaǵan aradaı júgirip, jaıaý-jalpylap maqalaǵa ózek bolatyn aqparatty izdeıdi. О́tken jyly kúzde gazet jartylaı jekeshelendirilgen bolatyn. Degenmen áli aýdan ákimdiginiń tolyq qoldaý-kómegimen shyǵyp otyr. Taralymy ótken jyly 1,5 myń dana boldy. Bul aýdan turǵyndarynyń jalpy sanyna shaqqanda on paıyzdy quraıdy. Jankeldın aýdanyndaǵy eldi mekender Torǵaı kentinen eń kem degende 30-40 shaqyrym, tipti kópshiligi 70-100 shaqyrymda jatyr. Gazetti «Qazposhtanyń» aýdandyq, aýyldyq bólimsheleri jetkizedi. Redaktor Gúlim Smaǵuldyń aıtýyna qaraǵanda, gazet oqyrmanyna bir aptanyń ishinde jetse – kóńilge demeý. Oblystaǵy aýdandyq, qalalyq basylymdar arasynda «Bizdiń Torǵaıdan» bólek kórshi Amangeldi aýdandyq «Amangeldi araıy» gazeti taza qazaq tilinde shyǵady. Onyń taralymy búginde 1800 danany quraıdy. Aýdannyń halqy qazir 17 myńnan asady. – Aýdanda 2400-deı otbasy bar. Bir úıde birneshe oqyrman bar dep esepteımiz, sondyqtan biz qazir oqyrmandarymyzdy jarydan aýa qamtyp otyrmyz. Bıylǵy baspasózge jazylý naýqanynda taralymdy 2200-ge jetkizý oıymyzda bar, – deıdi gazet redaktory Hamıtbek Musabaev. О́tken jyly jaýapkershiligi shekteýli seriktestigine aınalyp, gazet tolyq jekeshelendirýge kóshti. – Alǵashqyda gazettiń jeke­shelen­dirilýinen qorqa tartqanbyz. Qazir biz túsindik, redaksııa ujymynda «gazet – asyraýshymyz» degen túsinik basymdyqqa ıe bolyp kele jatyr. Sol úshin ujymdaǵy bes adam tynbaımyz, izdensek ǵana tabys keledi, – deıdi redaktor. Degenmen, gazettiń menshik formasy ózgergenimen, jaǵdaıdyń burynǵydan asa ózgerip ketpegeni baıqalady. Gazetke tabys taralymy, jarnama jáne aýdan ákimdiginiń ishki saıa­sat bólimi jasaǵan memlekettik tapsyrysy arqyly keledi. Osy qarajat­tyń barlyǵyn qosqanda ýaqyt talabyna, oqyrman talǵamyna saı basylymnyń dızaınyn durystaý, saıtty jolǵa qoıý, bet sanyn kóbeıtý, kadr biliktiligin kóterý sekildi gazettiń zamanaýı silkinýine mursha kelmeı otyr. Aýdan negizinen mal sharýashylyǵy, onda da maldyń kóbi jeke sektorda. Sondyqtan gazetke habarlandyrý, quttyqtaý, kóńil aıtý sekildi usaq-túıekten ǵana aqsha túsedi. Hamıtbek Musabaevtyń aıtýynsha, gazet materıaldary da jergilikti oqyrmannyń kóńil qalaýyn eskeredi. Negizinen 8 jáne ishinara 12 bet bolyp shyǵady. Torǵaı óńirindegi osy eki basylymnan basqa Qostanaı oblysynyń aýdandary men qalalaryndaǵy gazetter negizinen orys jáne qazaq-orys tilderinde basylady. Qalalardy aıtpaǵanda, aýdandyq gazetterdiń eń kóp taralymy 4800 danany quraıdy. Al óndiristi Rýdnyı qalasyndaǵy «Rýdnenskıı rabochıı», «Magnetıt» gazetteriniń taralymy 13-17 myńǵa jetip jyǵylady. Oblys attas Qos­tanaı aýdandyq «Arna» gazeti 3500 taralymy bar aýdandyq iri gazettiń biri. Aptasyna bir ret 16 betpen, qajet kezderi 32 betpen shyǵady. Alaıda oblys ortalyǵynyń irgesindegi aýdan halqynyń sany 70 myń shamasynda ekenin eskersek, gazet taralymy onyń on paıyzyn da ala almaı otyr. Gazet redaktory Jumakúl Erqasymova bul jaǵdaıdyń birneshe sebepterin alǵa tartty. – Gazetti basqarǵanyma on bes jyl boldy. Osy ýaqyt ishinde baıqaǵanym, jyl saıyn merzimdi basylymǵa jazylý kórsetkishi tómendep keledi. Onyń basty sebebiniń biri – adamdardyń gazetke qyzyǵýshylyǵy, oqýy nasharlap ketti. Saýalnama júrgizgenimizde olardyń basym kópshiligi gazetti onyń elektrondyq nusqasynan oqyp otyratynyn aıtty. Gazettiń saıtyn tek qostanaılyqtar ǵana emes, shetelden, Reseıden, Belorýssııadan, Germanııadan qaraıtyndar bar. Bizdiń baıqaýymyzsha, jyl saıyn bizdiń saıtqa kiretinder sany artyp keledi. Bul bir jaǵynan qýanyshty da shyǵar, ekinshi jaǵynan ókinishti. Sebebi saıttyń oqyrmany kóbeıgenimen, biz odan tabys taýyp otyrǵanymyz joq, – deıdi redaktor Jumakúl Maratqyzy. Oblys ortalyǵyna jaqyn aýdan bolsa da gazettiń tabysy taralymnan jáne aýdan ákimdigi jasaǵan memlekettik suranystan túsedi. Iri aýdan bolǵanymen gazet jarnamaǵa jarymaıdy. – Qazir kásipkerler de, kásip­oryn­dar, jalpy bıznes salasynda­ǵylar jarnamanyń ózderine arzan túsetin túrlerin taýyp alǵan. Habarlandyrýlaryn, jarnamalaryn ózderiniń saıtyna ornalastyrady, kóshege iledi, júrginshilerge paraqshalar taratady, áıteýir gazetke berýge yqylasty emes, – deıdi redaktor. Jalpy oqyrmandardy tartý gazet redaksııasynyń kún tártibinen, is-josparynan túspeıdi. Aýdandyq gazetterdiń kópshiligi sekildi «Arna» gazeti de taralymnyń azdyǵyn «Qazposhta» qyzmetiniń nasharlyǵyna saıady. Aýyldarda poshta qyzmetkeri kúni boıy otyr­maıtyndyǵyn, gazetterdiń ýaqytyly jetkizilmeıtindigin aıtady. Bul endi tek aýdandyq gazetter úshin ǵana emes, barlyq basylymdardyń basynda bar, aıtyla-aıtyla jaýyr bolǵan másele. Qys aılarynda basylymdardy eldi mekenderge jetkizý tipti baıaýlaıdy. Qandaı menshik túrinde bolsa da, aýdandyq, qalalyq gazetterdiń aýdan ákimdigimen «ılegeni bir teriniń pushpaǵy», sol óńirdiń muńyn muńdaıdy, jyryn jyrlaıdy. Muny túsingen ákimder aýdandyq, qalalyq gazetterge qol­daý-kómegin kórsetip, birlesip ju­mys istep otyr. Ondaı gazetterdiń jaǵdaıy da jaman emes. Mysaly, Taran aýdandyq «Shamshyraq-Maıak» gazetiniń taralymy sońǵy jyldary 2600 danadan 3500-ge bir-aq kóterildi. Gazettiń jyldyq bıýdjeti eki esege jýyq ósti. Redaksııa ujymy otyratyn ǵımarat eýrojóndeýden ótkizildi. Jýrnalıster sany artty, ózge aýdandyq gazetter redaktordan bólek bir ǵana tilshi ustasa, munda 5 jýrnalıst qyzmet etedi. Kólik bergen. Osyǵan sáıkes aýdan ákimi Baqbergen О́teýlınniń de talaby bar. Ol jýrnalısterden aýdan ómirin shynaıy kórsetýdi, usaq kemshilikterge deıin jazýdy usynady. – Ákim «aýdandyq gazet – aýdan­nyń aınasy bolýy, onyń nazarynan eshteńe syrt qalmaýy tıis» dep, syn materıaldarǵa kóńil bólýdi tapsyrady. Syn materıaldarǵa, oqyrmandar gazetten saýǵa surap jazǵan shaǵymdarǵa aýdandyq prokýratýranyń nazaryn aýdaryp otyramyz. Gazet kótergen máseleniń nátıjesi bolýy kerek, – deıdi redaktor Aıbatyr Ahmetbekov. «Arna» jalqy emes, oblysta sapasy, taralymy, dızaıny, mazmuny, tipti jarnama tartý jaǵynan áriptesterinen oq boıy alda kele jatqan Qarabalyq aýdandyq «Aına» gazetin oqyrmandar izdep oqıdy. Alaıda oblystaǵy aýdandyq gazetterdiń barlyǵy birdeı mundaı emes, keıbir aýdandyq gazetter áli de jupyny. Mysaly, Qamysty aýdandyq «Qamysty jańalyqtary» gazeti 650 danamen taralady. Mundaı taralymy az, áljýaz basylym Elbasynyń saıasatyn, eldi ekonomıkalyq damytý baǵdarlamalaryn, aýdan ákiminiń jasap jatqan isterin oqyrmanǵa qalaı jetkizedi? Jalpy, oblysta 30 aýdandyq-qalalyq merzimdi basylym shyǵyp turady. Onyń 23-i saıası-qoǵamdyq gazetter de, qalǵan 7-ýi jarnamalyq basylymdar. Kadrlarmen qamtamasyz etý, gazetterdi eldi mekenderge ýaqytyly jetkizý aýdandyq basylymdardyń ortaq problemasyna aınalǵan. Eki tilde shyǵatyn aýdandyq, qalalyq gazetterde memlekettik tildegi maqalalar tym az, qorash. Maqtaýyn keltirgen «Aına» gazetiniń ózi qazaq tilindegi maqalalar men aqparattardy bir betten asyrmaıdy. Kadr joq deıdi. Bıyl A.Baıtursynov atyndaǵy Qostanaı memlekettik ýnıversıtetin jýrnalıs­tıka mamandyǵy boıynsha orys jáne qazaq toptarynda 35 túlek bitirdi. – Jyl saıyn túlekterdiń shamamen 80 paıyzy jumysqa mamandyǵy bo­ıynsha ornalasady. Alaıda aýdandarǵa jastardyń ilýde bireýi ǵana barady. Jitiqara, Lısakov, Rýdnyı, Arqalyq qalalaryna barýǵa nıet etkender tym sırek. Túlekterdiń barlyǵy Astana jáne basqa qalalarǵa ketedi, oblys ortalyǵynda qalady. О́ıtkeni jas jýrnalısterdi jaǵdaı jasap shaqyrǵan aýdan ákimderin áli kezdestirgen joqpyz, – deıdi jýrnalıstıka kafedrasynyń meńgerýshisi Almataı Júsipova. Aýdandyq, qalalyq gazetter oqyrman talǵamyna tolyq saı bolýy úshin ol oqyrmannyń sońynda emes, aldynda júrýi tıis. Ýaqyt, qoǵam tynysyn dóp basqanda ǵana oqyrman gazetti izdeıtinin biz tildesken re­dak­­torlardyń ózderi de aıtty. Taralym kóbeıgen saıyn gazettiń tabysy da artady. Gazetke qansha materıaldyq jaǵdaı jasalǵanymen, onyń mazmundyq sapasyn kóteretin tek maman jýrnalıster ekeni belgili. Názıra JÁRIMBETOVA «Egemen Qazaqstan», Qostanaı oblysy

Basylym da zamanǵa saı bolýy tıis

Jasyratyny joq, Jambyl oblysy buqaralyq aqparat quraldary sany jaǵynan maqtana almaıdy. Nebári 170 shaqyrym qashyqtyqta jatqan shyraıly Shymkent shaharyndaǵydaı aı saıyn bir gazet ashylyp, aqparat maıdany qyp-qyzyl órt bolyp jalyndap jatqan joq. Ras, oblys ortalyǵynda birdi-ekili táýelsiz gazetter bar. Olardyń kóbisi orys tilinde jáne negizinen jarnama taratýdyń arqasynda kúneltip otyr. Al aýdandarǵa keler bolsaq, búginde tek Merki aýdanynda ǵana eki-úsh jekemenshik gazet-jýrnal jaryq kóredi. Bir jaqsysy, naryqtyń qandaı qıyn kezeńderinen ótse de, aýdandyq gazetter jabylyp qalǵan joq. Shtaty qysqardy, taralymy azaıdy, orys-qazaq redaksııalary qosylyp ketti, áıteýir bul basylymdar qandaı tar jol, taıǵaq keshýden ótse de aýdannyń tynys-tirshiligin buqaraǵa jetkizýden esh jańylǵan emes. Áıtse de sońǵy jyldary «Aýdandyq gazetter jekemenshikke satylady eken» degen áńgimeniń qoıýlana bastaǵany ras. Alǵashynda «Áreń-áreń kúneltip otyrǵan aýdandyq basylymdarda qandaı paıda bar? Eshqandaı kásipker satyp almaıtyn shyǵar-aý...» degender de bolǵan. Biraq naryq óz degenin isteıdi eken. Búginde Jambyl oblysyndaǵy barlyq aýdandyq gazetterde jekemenshiktiń úlesi bar. Atap aıtar bolsaq, Qordaı, T.Rysqulov, Merki, Baızaq, Talas, Moıynqum, Shý, Jýaly, Jambyl aýdandyq gazetteriniń 51 paıyz úlesi jergilikti qarjy bóliminiń menshiginde bolsa, qalǵan 49-y jeke kásipkerlerdiń ıeliginde. Tek Sarysý aýdany men Taraz qalasynyń ákimdigi óz qoldarynda gazettiń 90 paıyz úlesin ustap otyr. Taralym jaǵyna keletin bolsaq, Taraz qalalyq jáne Talas, Qordaı aýdandyq gazetteri 9 myńnan astam tırajben jaryq kórip jatsa, qalǵandarynyń eki jarym men bes myńnyń arasynda oqyrmandary bar. Árıne, aýdandyq gazetter jaǵdaıynyń jaqsy-jaman bolýy sol aýdan ákiminiń basylymǵa degen kózqarasyna tikeleı baılanysty ekenin jasyrýǵa bolmas. Sodan bolar mundaı basylymdar aýdan ákiminiń árbir is-sharasyn kópirtip jazyp, onsyz da alaqandaı gazet betin tıimdi paıdalana almaı jatatyny bar. Endi jeke kásipkerler gazet ómirine qandaı serpin ákeldi? – Gazet menshiginiń jartysyna jýyǵy jekemen­shiktiń úlesine tıgeli beri jumysymyzdy taǵy bir pysyqtap, jandandyrǵanymyz ras, – deıdi Talas aýdandyq «Talas tynysy» gazetiniń bas redaktory Dúısen Moldaqulov. – Biraq eshqandaı shtat qysqarý máselesi oryn alǵan joq. Taǵy bir jaǵymdy jańalyǵymyz – gazetimiz oblys ortalyǵynda basylyp, túrli-tústi bolyp shyǵa bastady. Odan bólek jeke kásipkerdiń arqasynda jańa kompıýterler alyp, jumysymyzdy jeńildettik. Sondaı-aq gazetimizde mazmun jaǵynan da kóptegen ózgerister bolyp jatyr. Kadr jaǵynan eshqandaı másele joq. Tilshilerimizdiń bári óz isin biletin alǵyr mamandar. Aýdandyq gazetter jekemenshikke satylǵaly beri jaǵdaı­lary tipten jaqsy bolyp ketti deýge bolmas. Qujat júzinde «satyldy» degeni bolmasa, aýdandyq ákim­dikten burynǵysha memlekettik tapsyrys bo­ıynsha qarjylaryn alyp, jumystaryn burynǵysha jalǵas­tyryp kele jatqan basylymdar da bar. Bul jerde istiń tetigi sol gazet basshylyǵynda otyrǵan azamat­tardyń qolynda sııaqty. Jergilikti bılikpen de, jeke kásipkermen de tyǵyz qarym-qatynas jasap, eki jaq­tyń da tilin taba bilse, gazettiń jumysy jandana­tyny anyq. Ákimdikti qaıdam, kásipkerler paıda joq jerge attap aıaq baspaıtyny beseneden belgili. Sondyqtan aýdandyq gazetterge jekemenshiktiń aralasýy bul basylymdardyń mazmunynyń ózgerýine, sapasynyń jaqsarýyna tikeleı áser etýi tıis. Zamanǵa saı beıimdelip, jańasha gazet shyǵarý qajet. Áıtpese tek aýdandyq ákimdik bólgen qarjyny burynǵysha jumsap, óz bıdaıyn ózine qýyryp berý eshkimge abyroı ápermeıtini anyq. Qalaı aıtsaq ta óńirdegi aýdandyq gazetterdiń ahýaly nashar deýge kelmeıdi. Qońyrqaı, birqalypty ortasha tirligimen-aq aýyl halqyn aqparatpen qamtamasyz etip otyr. Endi zaman ózgerdi, qurylymy ózgerdi, soǵan saı gazet beti de ózgere alsa, qanekı! Oralhan DÁÝIT, «Egemen Qazaqstan» Jambyl oblysy

«Hantáńiri» jabylý aldynda tur

Aýylda turmaǵanymyzben, aýdan ómirin baspasóz arqyly únemi bilip otyramyz. Jaqsy isterine qýanyp, keıbir kemshilikterine «áttegen-aı» dep qalatynymyz taǵy bar. Jaqynda elge barǵan edim. Jasymyzdan súıip oqıtyn aýdandyq «Hantáńiri» gazetiniń aýyr jaǵdaıyn kórip, qatty qınaldym. Tarıhy sonaý 1936 jyldan bastalatyn Raıymbek aýdandyq «Hantáńiri» (burynǵy «Sovettik shekara») gazetinde kezinde Berdibek Soqpaqbaev, Muqaǵalı Maqataev, Baqqoja Muqaı, Álnur Meıirbekov, Erkin Ibitanov, Dáýlet Jeldikbaev, Aıtaqyn Ábdiqalov, Batyq Májıtuly, Minýar Ákimhanov, Rysbek Sársenbaev sııaqty elge tanymal jazýshylar men jýrnalıster jumys istegen. Sol gazet «Jetisý-aqparat» medıaholdıng mekemesi taratylǵan soń, byltyrdan beri 50 paıyzy aýdan ákiminiń, al qalǵan 50 paıyzy redaksııanyń qaramaǵyna berilipti. Bıylǵy jyly memleket tarapynan baspasózge qoldaý kórsetip, «Hantáńiri» gazetine 16 mıllıon teń­ge qarastyrylypty. Zaman talabyna saı aýdandyq ákim­shiliktiń ishki saıasat bólimi tender ótkizgen. Alaıda belgisiz sebeptermen aqpan aıynda ótkizilýge tıisti tender tórt aı keshiktirilip, 23 maýsymda ótken. Tenderden 4,5 mıllıon teńge kóleminde utyp alǵan qarajat redaksııaǵa osy kúnge deıin túrli syltaýlarmen berilmegen. Qarajattyń jetpeý saldarynan túrli kommýnaldyq shyǵyndardy tóleý múmkin bolmaǵan. Amaldyń joqtyǵynan bes jýrnalıst kezeksiz, eńbekaqysyz demalysqa jiberilgen. Almaty qalasyndaǵy «Almaty Bolashaq» baspahanasyna 917 myń teńge qaryz kórinedi. Jyl basynan bastap olar basylymnan túsken qarajatpen ǵana qyzmetkerlerge eńbekaqy tólep kelgen. Eńbekaqy demekshi, olardyń jalaqysynyń aldy 150 myńnan assa, tómengi jalaqylary 39 myńnan az ǵana kóp eken. Sonyń ózin ýaqtysynda bermeı otyrǵan sheneýnikterge qalaı renjimeısiń. Gazetke aýdan basshylarynyń jete mán bermeýleri saldarynan ol óz jumysyn toqtatýdyń aldynda tur. Seksen jyldyq tarıhy bar osy basylym buryn-sońdy osyndaı qıyn jaǵdaıda qalyp kórgen emes. Ol – aýdannyń betke ustar aınasy. Aýdannyń barlyq jaqsy jumystaryn asyryp, jamandarynyń kemshilikterin aıtyp, sol olqylyqtardy der kezinde túzetýge yqpal jasap otyratyn basylymǵa kóńil bólmeý – aýdan ákimdigine, onyń tıisti bólimine úlken syn. Keıingi jyldarda aýdannan basqa jaqqa qonys aýdarýshylar azaımaı otyr. Olardyń kóshý sebepterin anyqtap, taldaý jasaý, tizimderin alyp, esep júrgizý, kóshýdi boldyrmaýdyń joldaryn qarastyryp, jumys oryndaryn ashý sııaqty taǵy basqa ózekti máselelerdi gazet betterinde jarııalap otyrsa, bul úderistiń azaıýyna septigi tıgen bolar edi. Aýdan basshylary osyndaı ózekti máselege jete kóńil bólýleri qajet sııaqty. Jýrnalısterdiń jaǵdaılary oıdaǵydaı bolmasa, olar qarajat jaǵynan qysylyp jatsa, olardan jumys talap etý orynsyz bolatynyn túsine bilgenimiz durys. Iá, búgingi aýdandyq gazettiń ahýaly osyndaı. Oǵan aýdannyń atqaminerleri ne deıdi? El-jurt buǵan qalaı qaraıdy?  Berkin ÁKEBAEV, respýblıkalyq «Altyn qalam» ádebı baıqaýynyń júldegeri  Almaty oblysy, Raıymbek aýdany ----------------------------------------------------------- BET QATTALYP JATQANDA: Almaty oblysy Narynqol aýdandyq «Han­táńiri» gazetiniń taǵdyr-talaıyna qatysty ob­lystyq ishki saıasat basqarmasynan tómendegishe hat kelip tústi: «Almaty oblysy ishki saıasat basqarmasy res­pýb­lıkalyq «Altyn qalam» ádebı baıqaýynyń júldegeri Berkin Ákebaevtyń hatyna sáıkes, 2016 jyly memlekettik aqparattyq tapsyrys­ty júzege asyrýǵa memlekettik bıýdjetten Raıymbek aýdanyna 16 mln 538 myń teńge bóli­nip, bul qarajat Raıymbek aýdandyq ishki saıasat bólimine tolyqtaı aýdarylǵandyǵyn habarlaıdy. Satyp alý jeńimpazyn anyqtaý jergilikti atqarýshy organdardyń quzyretine kiredi». Hatqa oblystyq ishki saıasat basqarmasynyń basshysy R.Alpysbaev qol qoıǵan. Sonda aýdandyq ishki saıasatqa áldeqashan aýdarylǵan qarjy «Hantáńiri» gazetine ne úshin berilmeı otyr? Qalaı bolǵanda da aýdandyq gazet­tiń tenderde utyp alǵan 4,5 mıllıon teńgesi áli kúnge sheıin redaksııanyń esep-shotyna aýda­rylmaǵandyǵy kúdik týdyrady. Bul bıyl el Táýelsizdiginiń 25 jyldyq mereıtoıynda Elba­sy­nyń memlekettilikti nyǵaıtýdaǵy syndarly saıasatyn gazet oqyrmandaryna jetkizýge jasalyp otyrǵan kedergi emes pe? Oǵan qosa aýdan kóle­mindegi jańalyqtardy, ótkizilip jatqan sharalardy aýdandyq gazet jazbaǵanda qaı gazet jazady? Azattyq alǵanymyzdyń shırek ǵasyrlyq mereıtoıyn toılatyp jatqanda, «Hantáńiri» syndy tarıhy tereńde jatqan gazettiń jabylýy Raıymbek aýdany ákimdigine úlken syn bolatyny anyq.