Talasbek Ásemqulovtyń kóptomdyǵynyń tusaýkeseri ótti

Búgin Ulttyq akademııalyq kitaphanada kúıshi, jazýshy, zertteýshi, kınodramatýrg Talasbek Ásemqulovtyń kóptomdyǵynyń tusaýkeseri boldy. Tusaýkeserge memleket jáne qoǵam qaıratkeri Myrzataı Joldasbekov, jazýshy Tursyn Jurtbaı men Turlybek Mámeseıit jáne ádebıetsúıer qaýym qatysty. Josparlanyp otyrǵan kóptomdyqtyń bıyl memlekettik tapsyryspen «Qazaq ensıklopedııasy» baspasynda bes tomy jaryq kórgen. Oǵan avtordyń prozalyq shyǵarmalary, ádebıet pen óner týrasyndaǵy maqalalary men mádenıettaný salasyndaǵy zertteýleri jáne kınodramatýrgııadaǵy eńbekteri engen. Kesh barysynda óz estelikterimen bólisken Tursyn Jurtbaı Talasbektiń aýdarmashylyq qyryna nazar aýdaryp, onyń jazýshylyq sheberligine, kúıshilik talantyna toqtalyp, san qyrly óner ıesi bolǵandyǵyna talas joqtyǵyn taǵy bir atap ótti. Talasbekti ustaz tutyp, sońynan ergen inileri men shákirtteri kúı tartyp, sharapatty sharanyń shyraıyn keltirdi. Raýan QAIDAR