Shaǵyn aýdan shattyǵy

Oblys ortalyǵyndaǵy «Alıýmınstroı» shaǵyn aýdanynyń burynǵy turǵyndary paıdalanýǵa berilgen jańa úıden jarqyraǵan páterlerge ıe bolýda. Burynǵy turǵyndary deıtinimiz, qalada ótken ǵasyrdyń 50-shi jyldary salynǵan eki qabatty turǵyn úıler ábden tozyǵy jetip, apatty jaǵdaıda edi. Kópten beri bul jerge jańa úı turǵyzý máselesi de jıi aıtylyp júrdi. Osydan úsh-tórt jyl buryn eski úıler ornynan «Saryarqa» atty jańa turǵyn úı kesheniniń jobasy jasalyp, bul maqsatty isti Úkimet te qoldady. Qurylys «2020 jylǵa deıin óńirlerdi damytý» baǵdarlamasy boıynsha júrgizilýde. Negizi bul bastama, qazirgi Úkimet basshysy Baqytjan Saǵyntaev oblysta ákim bolyp turǵan kezde qolǵa alynǵan bolatyn. On eki qabatty bıik úılerdiń jobalaý jumystaryn júrgizýge, ınjenerlik-kommýnıkasııalyq jeliler tartýǵa qarjy da bólindi. Sóıtip, keleshekte 160-qa jýyq eski, eki qabatty úıler buzylyp, onyń ornyna jańa turǵyn úıler salynady delindi. Onda turyp jatqan 1272 otbasy bul jaqsy lebizdi estip, úmitterin úkilegen edi. Turǵyndarǵa beriletin baspananyń aýmaǵy eski páterlerdiń kólemine sáıkes bolatyny eskertilgen. Qurylys bas­talardan buryn, turǵyndar ýaqytsha basqa jerlerge kóshirilgen. Endi mine, jaqsy is jalǵasyn taýyp jurtty qýanyshqa bólep otyr. Maýsym aıynda «Saryarqa» turǵyn úı kesheniniń alǵashqy kezeńi paıdalanýǵa berilip, jańa páter kiltin 105 otbasy aldy. Sóıtip, ótken aptada «TemirTas-Pavlodar» JShS-niń temir-beton qurylǵylary negizinde salynǵan Sh.Shókın kóshesinde ornalasqan taǵy bir jańa úı qoldanysqa berildi. Ekinshi kezeńde 52 otbasy páter aldy. Turǵyndardyń qýanyshyn bólisýge oblys ákimi Bolat Baqaýov ta kelip qatysty. Úıdiń quny 502,5 mıllıon teńgeni quraıdy. Oblys ákiminiń aıtýynsha, jalpy, óńirdegi turǵyndardyń páter alýǵa degen qajettiligin azaıtý maqsatynda aldaǵy jyldary óńir ortalyǵynda 22 jańa úı salynady dep josparlanyp otyr eken. «9 úı kesheni osy jyldyń sońyna qaraı paıdalanýǵa beriledi. Bul – 900 otbasy jańa pátermen qamtamasyz etiledi degen sóz», – dedi B. Baqaýov. Qazir «Saryarqa» shaǵyn aýdanynda jańa úılerdiń qurylysy qarqyndy júrip jatyr. Jyl sońyna deıin osy aýdanda taǵy da 4 jańa úı turǵyndar enshisine berilmekshi. Aýdandaǵy turǵyn úı keshender qurylysy aıaqtalǵan kezde 4 myń otbasy pátermen qamtamasyz etiledi. Farıda BYQAI, «Egemen Qazaqstan»  PAVLODAR Sýretti túsirgen Valerıı BÝGAEV