KEGOC-tyń «altyn» komandasy

«KEGOC» AQ-tyń fılıaly «Aqmola JET» brıgadasy TMD keńistigindegi 110 kV jáne odan joǵary kerneýli qosalqy stansalardyń jabdyqtaryn jóndeý men olarǵa qyzmet kórsetý boıynsha komandalar arasynda úzdik atandy. Naqtysyna kelsek, «KEGOC» AQ elektr energetıkteri jýyrda ótken TMD-ǵa qatysýshy memleketterdiń elektr energetıkasy salasyndaǵy personaldyń kásibı sheberligi HIII halyqaralyq jarysynda top jaryp, birinshi oryndy jeńip aldy.  Mundaı kásibı jarystardyń ótkizilýi jáne onyń kompanııanyń damýyna tıgizetin mán-mańyzy týraly «KEGOC» AQ basqarma tóraǵasy Baqytjan QAJIEV aıtyp berdi. – Baqytjan Tóleýqajyuly,  sizdi je­­ńisti jetistikterińizben quttyqtap, aldaǵy kezde de tabys bıiginen kórine be­rýge tilektestik bildiremiz. Endi osy dúbir­li doda týraly tolyǵyraq aıtyp berseńiz.   – Aıtqanyńyz kelsin. Shynynda da, bul KEGOC kompanııasy úshin zor je­tistik ári qan­jyǵamyzǵa baılaǵan orny bólek olja. Atalǵan jarystyń mańy­zy asa joǵary eken­digin atap aıtqym keledi, óıtkeni, TMD elderiniń energııa birlestigi álemde eń iriler qatarynda. Onyń quramyndaǵy elektr stansalary 370 gıgavatqa jýyq bel­gilengen qýat­ty quraıdy. Aýqymdy saıys­ta Qazaq­stan atynan synǵa túsken KEGOC ko­mandasynyń birinshi orynǵa shy­ǵýy, bizdiń mamandardyń halyqaralyq deńgeıdegi bıik biliktiligin tanytady. Bıyl Aqmola oblysynyń Makınsk qala­­syna taıaý jerdegi «KEGOC» AQ-tyń oqý-jattyǵý polıgonynda Táýelsiz Mem­­leketter Dostastyǵy elderiniń mamandary sheberlikterin synady. Atap aıtqanda, Belarýs, Grýzııa, Qazaq­­stan, Reseı jáne О́zbekstan brıgadalary bá­se­kelesti. Sonymen qatar, jarysqa Qyr­­­ǵyz­stan, Tájikstan jáne Ýkraına ókilderi baıqaýshylar retinde qatysyp, baǵalaryn berdi. Saıysqa Qazaqstan atynan «KEGOC» AQ fılıaly «Aqmola JET» energetıkteriniń brıgadasy tústi. Tórt kún ishinde, ıaǵnı 19-22 qyrkúıek ara­lyǵynda 6 kezeń boıynsha brıgada­lar ózderiniń bilimderi men sheberlikterin kórsetti. Qoldanystaǵy erejeler men nus­qaýlyqty bilý, qýat ótkizý jab­dyq­taryna baqylaý júrgizý daǵdysy, KTPN-100/10/0,4 kV jabdyǵynyń jumys barysynda qyzýy, RNDZ-2-110/1000 aıyrǵyshyn qaraý, oq­shaýlaǵyshty aıyr­bastaý men aıyrǵyshty retteý (PR-90/180LP qol jetegimen), maı sy­namasyn irikteý, manometrdi almas­tyrý jáne 220 kV rezervtik qosýǵa maı quıý, KRÝN-10 kV syrtqy qondyrǵynyń ke­shendi taratý qurylǵylarynda órtti són­dirý daǵdylary, elektr togynan zardap shegýshini bosatý jáne oǵan kómek kórse­tý (reanımasııalyq trenajerlerdi paıdalanyp) tárizdi synaq­tar jarysýshylarǵa ońaı soqqan joq. Qorytyndysynda, bizdiń komanda birinshi oryndy jeńip aldy. Osy arada mynany erekshe atap aıtqym kelip otyr, KEGOC-tyqtar árkez joǵary oryndardy ıelenip, barlyq jarystarda júldegerlerdiń úshtigine kirýdi dástúrge aınaldyrǵan. – Atalǵan jarys byltyr Belarýs Res­pýblıkasynda uıymdastyrylǵan edi. Bul kásibı saıys qandaı kezeńmen ótedi? – TMD keńistigindegi elektr energetıkter arasynda atalǵan halyqaralyq kásibı jarys 2004 jyldan beri turaqty ótip keledi. Jyl saıyn ártúrli beıin­de­gi mamandar sheberlikteri men jınaqtaǵan tájirıbesin tanytady. Energııa júıesi­niń dıspetcherinen bas­tap joǵary volt­ty jelilerge qyzmet kórsetetin mamandar, qosalqy stansalardyń jabdyqtaryn qadaǵa­laıtyn jumysshylar jiti qımyl­dap, besaspap ekendikterin pash etedi. Joǵary deńgeıdegi jarys biz­diń maman­dardyń kásiptik daǵdylaryn baǵalaýǵa múm­kindik beredi. Elektr ener­­getıkasy salasy kez kelgen mem­lekettiń ekonomıkasyn meı­linshe kóte­rip, órkendetetin júıe bolyp tabylady. Sondyqtan da, bizdiń jáne TMD el­derindegi áriptesterimizdiń aldynda búkil tutynýshylardy elektrmen senimdi jabdyqtaýdy qamtamasyz etýdiń birdeı mindeti turǵany málim. Salamyzda salǵyrtyqqa jol beril­meıdi. Mamandardan biliktilikterin turaqty arttyrýdy, kásibı sheber­likterin jetildirýdi, ozyq tájirıbeni júıeli zerdeleýdi, jumys sapasyn jaqsartyp, jelilerde apattyq qaýip-qaterlerdi boldyrmaýdy talap etemiz. Eńbek qaýip­sizdigin qamtamasyz etýdiń máse­leleri osyndaı túıinderdi túbegeıli sheshýge kómekteseri sózsiz. Jańa obektiler qurylysyn salý ke­zinde qaýipsizdik qashanda kókeıkesti bolyp, túıtkildi jaǵdaılardy durys sheshýge jol ashady. Qurylys júrgizý barysynda zamanaýı jáne joǵary tıimdi jabdyqty qoldanamyz. Qazir­gi kezde bizdiń kompanııada keshendi jań­ǵyrtýdyń kezeńi aıaqtalýǵa taıaý. Ozyq tehnologııalardy en­gizip, qo­salqy stansalardyń joǵary volt­ty jabdyǵyn, relelik qorǵanyshty jáne apatqa qarsy avtomatıkany ja­ńart­­tyq, sandyq korporatıvtik tele­kommýnıkasııalyq jeli men elektr ener­gııasyn kommersııalyq esepteýdiń avtomattandyrylǵan júıesin qurdyq. Jumysymyzdy alǵa bastyra­­tyn osy taqylettes jarys bizge qazirgi za­­­man­ǵy jabdyqqa qyzmet kórsetý tájirıbesin alýǵa, qoldanylatyn ke­rek-jaraqtyń sapasyn baqylaýǵa barynsha járdemdesedi. Máselen, jarys kezinde kez kelgen komandaǵa jekelegen kezeńderde jabdyǵyn jáne qural-saı­manyn paıdalanýǵa ruqsat etiledi. Bul basqa komandalarǵa onyń tıimdiligin zerttep bilýge, baǵalaýǵa múmkindik tý­ǵy­zady. Aldaǵy ýaqytta ózderiniń ulttyq jelilerinde iske paıdalanýǵa septigin tıgizedi. TMD energetıkterimen dostyq baılanystardy ornatý úshin osyndaı jarys uıymdastyrý mańyzdy ári paıdaly. Qazaqstan Respýb­lıkasynyń Birtutas elektr energetıka júıesi TMD elderiniń energııa júıelerimen qatar jumys isteıtinin osy arada atap aıtqan jón. Sebebi, áriptesterimizben birge mańyzdy ekonomıkalyq ortaq mindetti atqaryp jatyrmyz. – Bizdiń elimizge «altyn» ákelgen mamandar týraly baıandap berseńiz. – Men joǵaryda aıtqanymdaı, elimizdiń namysyn jarys jolynda «KEGOC» AQ fılıaly «Aqmola JET» energetıkteriniń brıgadasy qorǵady. Komanda quramynda 6 adam boldy. Bular – Erhat Elemesov, Vıacheslav Chaıkovskıı, Qaırat Qulmaǵambetov, Áli­bek Maǵzumov, Aıdyn Maqashev, Valerıı Nızamov, sondaı-aq, komanda kapıtany Berik Adamov degen azamattar. Onyń ishinde eń úlkeni Berik Adamovtyń jasy 41-de, eń kishisi Valerıı Nızamov jarys aldynda 25 jasqa toldy. Jalpy, komanda músheleriniń orta jasy 31-de. Olar joǵary biliktilikterin tanytyp, tereń teorııalyq bilimderimen qazylar alqasyn tánti etti, ózderin osylaısha bıik tuǵyrdan kórsetti. «Qoldanystaǵy erejeler men nusqaý­lyqtardy bilýdi tekserý» kezeńinde, meniń pikirim boıynsha, bizdiń oq boıy ozýymyz mine osy jetistiktermen baǵa­lanǵandyǵy eshkimge shúbá týdyrma­dy. Byltyr Belarýs elinde ótken jarys­ta joǵaryda atalǵan kezeń bo­ıynsha komandamyz báıgede oza shaýyp bas júldeni jeńip alǵan. Aldaǵy saıystarda da elimizdiń energetıkteri joǵary nátıjelerge qol jetkizip, namysty abyroımen qorǵaıdy dep senimmen aıtýǵa negiz bar. – Bárekeldi! Qashanda isterińiz ońdy bolsyn.    Áńgimelesken Marat AQQUL, «Egemen Qazaqstan»