«Eńbek joly» baıqaýy márege jetti

Astanada Eńbek kúnine arnalǵan «Jalpyǵa Ortaq Eńbek Qoǵamy» forýmy ótti. Onyń barysynda «Eńbek joly» respýblıkalyq baıqaýynyń jeńimpazdary marapattaldy. Densaýlyq saqtaý jáne áleýmettik damý mınıstrligi uıymdastyrǵan sharaǵa Parlament depýtattary, mem­lekettik organdar, halyqaralyq uıymdar, bıznes qaýymdastyqtar men kásipodaqtardyń ókilderi jáne jumyskerler qatysty. Densaýlyq saqtaý jáne áleýmettik damý mı­nıstri Tamara Dúısenova 2013 jyl­dyń 22 qarashasynda Elbasynyń Jarlyǵymen bekitilgen Eńbek kúnin merekeleý jyl saıyn qyrkúıektiń sońǵy jeksenbisinde atalyp júr­genin eske saldy. Merekeniń basty maqsaty – eńbek adamy mártebesin arttyrý, jastar arasynda jumysshy kásibin keńinen nasıhattaý jáne eńbek áýletteriniń jyldar boıǵy dástúrlerin nyǵaıtý bolyp tabylady. – Úkimet qazaqstandyqtardyń jumyspen qamtylýyna asa zor kóńil bólip otyr. Elimizde «Ju­myspen qamtýdyń jol kartasy-2020» baǵdarlamasy júzege asyrylyp keledi. Bul baǵdarlama tek jumysqa ornalastyrýdy ǵana emes, sonymen qatar, qoǵam­nyń, kásipkerlik salanyń damýy­nyń suranysy men jańa jumys oryndarynyń qurylýyna qaraı suranysqa ıe mamandyqtarǵa oqy­týdy qarastyrady. 5 jyldyń ishin­de baǵdarlamaǵa 710 myń adam qa­tysyp, onyń 533 myńy turaqty jumysqa ornalasty. 128 myń tur­ǵyn óz bilimderin jetildirip, jańa mamandyq ıeleri atandy, – dedi óz sózinde Tamara Dúısenova. Densaýlyq saqtaý jáne áleý­mettik damý mınıstrliginiń bastamasymen uıymdastyrylǵan «Eńbek joly» baıqaýy eńbek adamdary týraly jaǵymdy qoǵamdyq pikir qalyptastyrýǵa jáne kásiporyndar men uıymdarda jańa eńbek áýlet­teriniń qalyptasýyna jaǵdaı ja­saýǵa, qazaqstandyqtardyń bo­ıynda respýblıka ekonomıkasynyń damýyna aıtarlyqtaı úles qosqan otandastary úshin maqtanysh sezimin tárbıeleýge negizdelgen. Baıqaýdyń birinshi kezeńi aımaqtarda «Úzdik eńbek áýleti», «О́ndiristiń úzdik jas mamany», «Jumys isteıtin jas­tardyń úzdik tálimgeri» nomınasııa­lary boıynsha ótti. Respýblıka boıynsha baıqaýǵa barlyǵy 460 adam qatysqan. – Búgin «Eńbek joly» baı­qaýynyń aımaqtyq kezeńiniń úsh nomınasııasy boıynsha joǵary kór­setkishke jetken 48 jeńimpaz osy zalda otyr. Olardyń ishinde belgili bir salada qyzmet etip kele jatqan otbasylardyń 4 býynyn atap aıtý kerek. Shyǵys Qazaqstan oblysyndaǵy Fılıpovtar otbasy eńbek áýletiniń barlyǵy 360 jyl eńbek ótili bolsa, dál son­­daı eńbek ótili Aty­raý ob­ly­syndaǵy Aralbaevtardyń temir­­­jolshylar áýletinde de bar. Oń­tústik Qazaqstan oblysyndaǵy Jańabaevtar áýletiniń eńbek ótili – 242 jyl. Bizdiń elimizde mundaı otbasylar óte kóp. Barlyǵyna densaýlyq pen sáttilik tileımin, – dedi sóziniń qorytyndysynda Ta­mara Dúısenova. Respýblıkalyq «Eńbek joly» baıqaýy qorytyndysynda «Úzdik eńbek áýleti» nomınasııasy boıynsha jeńimpaz bolyp Atyraý oblysynan kelgen Aralbaevtar áýleti, «Jumys isteıtin jastardyń úzdik tálimgeri» nomınasııasy boıynsha «Sokolov-Sarybaı taý-ken baıytý óndiristik birlestigi» AQ-tyń ekskavator mashınısi Andreı Solovev jeńimpaz bolyp tanyldy. Soltústik Qazaqstan oblysy «Mambetov ı K» sharýa qojalyǵynyń naýbaıshysy Turar Qasymov «О́ndiristiń úzdik jas mamany» nomınasııasy boıynsha jeńimpaz atandy. Shara barysynda «Eńbek ar­dageri» tósbelgisimen Qazaqstan eko­nomıkasyn damytýǵa jáne nyǵaıtýǵa aıtarlyqtaı úles qosqan óndiristiń ár túrli salalarynyń 9 ardageri marapattaldy. Ulan SANJAR