Aqtóbe qaýipsizdikke erekshe nazar aýdara bastady

Oblysta «Halyqty qaýipsizdikpen qamtamasyz etý» jobasy bastaý aldy. Ony júzege asyrýǵa 200-den astam ortalyq jáne aımaqtyq memlekettik organdar men memlekettik emes uıymdardyń úzdik mamandary qatysýda. Delegasııany Bas prokýror Jaqyp Asanov basqarady. Budan basqa jumys tobynyń quramynda Prezıdent Ákimshiligi Ishki saıasat bóliminiń basshysy Aıda Balaeva, Bas prokýrordyń orynbasary Andreı Kravchenko, Ishki ister mınıstriniń orynbasary Erlan Turǵymbaev, Terrorızmge qarsy ortalyǵynyń shtab bastyǵy Marat Saıpoldaev, Ulttyq ekonomıka vıse-mınıstri Aıdar Arıfhanov, Azamattyq qoǵam jáne din isteri vıse-mınıstri Marat Ázilhanov, Densaýlyq saqtaý jáne áleýmettik damý vıse-mınıstri Svetlana Jaqypova jáne t.b. bar. Jumys toby bul baǵytta­ǵy qa­da­myn oblystyq ákimdikte óńir jurtshylyǵymen kezdesýden bastady. Kezdesýdi oblys ákimi Ber­dibek Saparbaev qysqasha sóz sóılep ashty. – Elbasy tapsyrma­sy boıynsha biz óńirdiń ózekti problemalaryn sheshýge múmkindik beretin jobany júzege asyrýdy bastadyq. Joba tek Aqtóbe qala­synda ǵana emes, barlyq aýdandar­da júzege asyrylatyn bolady. Bul bastamanyń bizdiń óńirdegi turaq­tylyq pen damýǵa oń yqpal etetinine senimdimin. Ortalyq at­qarýshy organdar ókilderi jer­gilikti turǵyndarmen kezdesip, mem­lekettik baǵdarlamalar aıasynda atqarylyp jatqan ju­mystardy jáne olardy júzege asyrýda týyn­daǵan problemalardy tal­qylaı­tyn bolady, – dep atap ótti ol. О́ńir basshysynyń aıtýynsha, oblysta tártip bu­zýshylyqtyń aldyn alý jónindegi vedomstvoaralyq komıssııa jumys isteıdi, onyń ju­mysyna prokýratýra, IID, UQKD jáne basqa organdardyń basshylary qatysady, toqsan saıyn qa­ýipsizdikti qamtamasyz etý máseleleri qaralady, tıisti sharalar qabyldanady. Eger 2015 jyly oblysta qaýipsizdikti qamtamasyz etýge jergilikti bıýdjetten 6,1 mıl­lıard teńge qarastyrylsa, bıyl 6,4 mıllıard teńge bólingen. Bul óz kezeginde qylmystyq jaǵ­daıdyń jaqsarýyna yqpal etken. Berdibek Saparbaev óńir­degi qoǵamdyq qaýipsizdiktiń tur­­­ǵyn­dardyń jumyspen qamtylýyna táýeldi ekenin atap ótti.Tek ótken jyly ǵana 10800 jańa jumys or­ny ashylǵan. Turǵyndardy jumyspen qamtamasyz etýdiń keshendi josparymen 17800 adam qamtylǵan. Qabyldanǵan sharalar jalpy jumyssyzdyq deńgeıin 4,9 paıyz, jastar jumyssyzdyǵyn 4 paıyzǵa azaıtýǵa múmkindik berdi. Sodan keıin sóz alǵan Bas prokýror Jaqyp Asa­nov jumys toby júzege asyratyn is-sharalar­dyń negizgi ba­ǵyttaryna tereńirek toq­taldy. – Elbasy Nursultan Nazarbaevtyń tapsyrmasy­men, óńir basshysynyń bastamasy boıynsha eki júzden astam maman keldik. Top quramynda ımamdar, teologtar, psıhologtar, sosıologtar bar. Maqsat kemshilik izdeý emes, jergilikti problemalardy birlesip sheshýge qol jetkizý. Jalpy, ju­­­­­­mysymyz jeti baǵyt bo­ıynsha, ıaǵnı halyq arasynda túsinik ju­mystaryn júrgizýge, shaǵyn kásipkerlikti jappaı damytýǵa, áleýmettik problemalardy sheshýge, dinı ahýaldy jaqsartýǵa, aqparattandyrý jumysyna, quqyq qorǵaý qyz­­metiniń tıimdiligin art­tyrýǵa basymdylyq beriledi. Bul jumystar bir aı boıy júr­giziledi. Árıne, barlyq máseleni sheship berý múm­kin emes. Degen­men, biz osy qadamdarymyz ar­qy­ly jer­gilikti máselelerdi she­shýdiń jolyn qalyptas­­tyrý­ǵa baǵyt ustap otyrmyz. Ony keıin basqa óńirlerde qoldansaq pa degen oıymyz da bar, – deı kelip, elimizdiń Bas prokýrory jınalǵan jurt­shylyq nazaryn birne­she mańyzdy máselelerge aýdardy. Ol álemdik daǵdarys jaǵdaıynda da Prezıdent­tiń tapsyrmasy bo­ıynsha áleý­mettik tólemderdiń qysqarmaı, qaıta jyl saıyn kóterilip otyrǵanyn aıtty. – Daǵdarystan shyǵýda bir ǵana memlekettiń sharasy jetkiliksiz. Árbir otbasy, ár azamat aıanbaı eńbek etýi kerek. Ol úshin óz isin ashýǵa, talmaı eńbek etýge daǵ­dylaný qajet. Kásipkerlik áli de damymaı jatyr. Memleket mol múmkindikter berýde. Úkimet tarapynan jasalyp jatqan qoldaý tetikteri tıimdi paıdalanylmaýda. Istiń qısynyn keltirip, ár qazaqstandyq tabysty bolýy úshin kúresýimiz kerek. Biz bul jaǵyn da qaperde ustaıtyn bolamyz, – dedi J.Asa­nov sóz arasynda. Odan ári ol qyl­myspen qoǵam bolyp kúresý qajettigin alǵa tarta sóıledi. Sońǵy 20 jylda aýyr jáne asa aýyr qylmystardyń jyldan-jyl­ǵa azaıyp kele jatqanyna naqty mysaldar keltirip, qylmysty eńserýdiń birden-bir joly – ju­mys­syz­dyqpen kúresý ekenin, byltyr qylmys jasaǵandardyń 84 paıyzy tabysy joq adamdar bolǵanyn atap ótti. Bas prokýror jastardyń dinı teris aǵym­darǵa sanasy ýlanyp, jat ıdeologııanyń qurbany bolyp júrgenine alańdaýshylyǵyn jetkizdi. Kezdesýde túrli baǵytqa basshy­lyq jasaıtyn vıse-mınıstrler men ortalyq memlekettik organdar basshylary ózderiniń jumys jos­parlarymen tanystyryp, osy kezeńde atqarylatyn sharalardy baıandady. Jalpy osy kezeńde 13454 adam qatys­­qan aqparattyq-túsinik ju­mystarymen 152 ártúrli sharalar ótkiziletin bolady. Bu­dan basqa, quqyq qorǵaý or­gandarynyń qyzmetkerleri, din taný pániniń oqytýshylary, psıhologtar, bar­lyǵy 890 adam qatysqan 19 sabaq pen semınar-trenıngte ádistemelik kómek kórsetilýde. 10 myńǵa jýyq aq­parattyq jáne ádistemelik materıaldar taratý kózdelýde. Joba aıasynda mádenı-kóp­shilik, sporttyq jáne basqa da sharalar uıymdastyrylady. Satybaldy SÁÝIRBAI, «Egemen Qazaqstan» Aqtóbe oblysy