Memlekettik qyzmettiń jaı-kúıi talqylandy

Keshe Qazaqstan Respýblıkasynyń Tuńǵysh Prezıdenti – Elbasynyń Kitaphanasynda Prezıdent janyndaǵy Ulttyq joǵary memlekettik basqarý mektebiniń (UJMBM) túlekteri qaýymdastyǵy uıymdastyrǵan Qazaqstan Respýblıkasy Táýelsizdiginiń 25 jyldyǵyna jáne Ulttyq joǵary memlekettik basqarý mektebiniń alǵashqy túlekteriniń 20 jyldyǵyna arnalǵan «Qazaqstannyń saıası memlekettik qyzmeti: qalyptasý jáne damý kezeńderi» atty forým bolyp ótti. Jıynǵa Prezıdent Ákimshiliginiń ókilderi, memlekettik organdardyń jáne ulttyq kompanııalardyń basshylary, UJMBM túlekteri, sondaı-aq «Nazarbaev Ýnıversıtet» pen Prezıdent janyndaǵy Memlekettik basqarý akademııasynyń oqytýshylary men magıstranttary qatysty. Is-sharanyń moderatory UJMBM túlegi, «Astana» Halyqaralyq qarjy ortalyǵynyń basqarýshysy Qaırat Kelimbetov boldy. Forýmnyń ashylýynda Mem­lekettik hatshy Gúlshara Ábdiqa­lyqova sóz sóıledi. Ol óziniń qut­tyqtaý sózinde saıası memlekettik qyzmettiń jańa álemdik damý trendteri arasyndaǵy birqatar ózekti baǵyttardy atap ótti. «Elimizdiń tarıhyndaǵy eleýli beles Táýelsizdiktiń 25 jyldyǵynyń aıa­synda ótkizilip otyrǵan saıası memlekettik qyzmetke arnalǵan forýmnyń mańyzy joǵary. Sondaı-aq, búgin Ulttyq joǵary memlekettik basqarý mektebiniń al­ǵashqy túlekteriniń qanat qaq­qanyna 20 jyl tolyp otyr. О́z­derińizge belgili Memleket basshysy bıylǵy jyldyń 1 qańtarynan 5 ınstıtýttyq reformany júzege asyrýdyń praktıkalyq kezeńi bastalǵanyn halyqqa jarııa etti. Bul asa mańyzdy qujat Qa­zaq­standy álemniń eń ozyq 30 eliniń qataryna engizýge baǵyttalǵan. 5 reformanyń birinshi reformasy – kásibı memlekettik appa­rattyń bolýy. Sondyqtan Ult josparynda kórsetilgen min­­det­terdi iske asyrýda saıası qyz­­metshilerdiń Joǵary ulttyq mem­­lekettik basqarý mektebiniń qo­syp otyrǵan úlesi qomaqty. El Táý­el­sizdiginiń bıylǵy 25 jyl­dyq merekesin Elbasy N.Á.Nazar­baev jyldyń eń basty oqıǵasy re­tinde belgilep, bizdiń barlyq eleý­li jetistikterimizdi árbir qazaq­stan­dyqqa jetkizý qajettigin atap kór­setti. Memleket basshysynyń bul tapsyrmasy bári­mizdiń aldy­myzǵa naqty mindet, úlken jaýap­ker­shilik júk­teıdi. Osy oraıda búgin­gi forým eldik merekeniń eńsesin tikteı­tin taǵy bir taǵylymdy is-shara­lar­dyń biri», – dedi Mem­lekettik hatshy. Elimizdiń memlekettik qyzmetin jańǵyrtý men halyqaralyq tá­jirıbe Memlekettik qyzmet sala­­syndaǵy óńirlik habtyń bas­­­qarýshy tóraǵasy Álıhan Baı­­me­­novtiń baıandamasynda kór­­se­tildi. «Táýelsizdik jyl­daryn­da Qazaqstan áleý­mettik-eko­no­mıkalyq refor­malarmen qatar, memlekettiń rólin óte tereń óz­gertken trans­for­ma­sııalardy júzege asyrdy. Osynyń ishinde memlekettik qyz­metti jetildirý de bar. Árıne, 90-jyldardyń orta­synda jap­paı jekeshelendirý men lıbera­lızasııa ótkennen soń, naryqtyq ekonomıkanyń qyr-sy­ryn biletin, naryqtyq ekono­mıkadaǵy memlekettiń rólin anyq túsinetin memlekettik qyz­metshiler qajet boldy. Memle­kettik saıasattyń ulttyq mekte­biniń uıymdastyrylýy osy qajet­tiligimizdi óteý úshin kerek boldy. Qazir jıyrma jyldan soń sol kezdegi sheshimniń durys ekenine kózimiz jetip otyr. О́ıtkeni, osy mek­teptiń túlekteri ár salada onyń ishinde, memlekettik basqarý sala­synda bıik jetistikterge jetti. Sonymen qatar, jalpy uzaq mer­zimdi qajettilikti óteý úshin El­basy 1993 jyly arnaıy «Bo­lashaq» baǵdarlamasyn quryp, búgingi ýaqytta biz sol «Bo­lashaqtyń» myńdaǵan túlek­teriniń el áleýetin kóterýde úles qosyp júrgenin kórip otyrmyz. Qazaqstan memlekettik qyzmet salasyndaǵy reformalarda aımaqtyq kóshbasshy bolyp tabylady. Oǵan bir negiz, biz árdaıym ozyq, halyqaralyq tájirıbelerdi zerdelep, sonyń jaqsylaryn endirýge tyrystyq. Ekinshi sheshýshi faktor – Elba­synyń saıası jigeri. Biz qazir Qa­zaqstanda memlekettik qyzmet reformasynyń úshinshi kezeńin jú­zege asyrýdamyz. Memlekettik qyz­met salasyndaǵy aımaqtyq hab taıaýda ǵana úlken eńbekti bitirip, tusaýkeserin ótkizdi. Bul – álemdegi memlekettik qyz­met salasyndaǵy jahandyq trend­ter. Bizdiń baǵalaýymyzsha Qazaq­standa bolyp jatqan reformalar osy jahandyq trendterge sáıkes. Degenmen, biz árdaıym alǵa qa­raı jetildire túsý tetikterin qara­s­tyrýymyz qajet», – dedi ol. Memlekettik qyzmetshilerdi daıarlaý tájirıbesimen Fransııa­nyń Qazaqstandaǵy Tótenshe jáne ókiletti elshisi Fransıs Eten bólisti. Forým qorytyndysy boıynsha Úkimetke Qazaqstan Res­pýb­lıkasynyń saıası memlekettik qyzmetin jetildirý jáne jańa tur­patty basqarýshylardy daıarlaý boıynsha usynymdar ázirlendi. Raýan QAIDAR, «Egemen Qazaqstan»