Almaty alaqanǵa salǵandaı

Demalys kúni almatylyqtar qýanyshty oqıǵanyń kýási boldy. Senbi kúni Almatyda alyp sholý dóńgelegi paıdalanýǵa berildi. «Happy Eye» ataýyna ıe bolǵan dóńgelek Ortalyq Azııadaǵy eń úlkeni desedi. Búkil qalany alaqanǵa salǵandaı anyq kórsetetin demalys nysanynyń ashylýyna qala ákimi Baýyrjan Baıbek qatysyp, alǵashqylardyń biri bolyp «Happy Eye» arqyly megapolısti tóbesinen kórdi.  Qalany 16 mınýtta tamashalap shyǵýǵa bolatyn «Happy Eye» dóń­gelegi MEGA Alma-Ata saýda, oıyn-saýyq ortalyǵynyń aýmaǵynda or­nalasqan. 2015 jyly Mega Cen­ter Management kompanııasy «Hap­py Eye» qurylysyna avtokólik tura­ǵy esebinen 1765 sharshy metr jer­di qarastyrǵan bolatyn. Qala kel­beti­men úılese ketken sholǵynshy dóń­gelek park aýmaǵynan tys ornalasqan. Bul jobany HAPPYLON kompanııasy men ıesi «Astana Group» kompanııasy birige otyryp júzege asyrdy. Qala turǵyndary ǵana emes, kelgen qonaqtarǵa tamasha áser syılaı alatyn Almatynyń alyp dóńgelegi týrısterdi tartýǵa da septesedi dep kútilýde. HAPPYLON kompanııasynyń negizin qalaýshy ári qojaıyny Rýstam Ageev jobany júzege asyrý barysynda qoldaý kórsetken barlyq azamattarǵa alǵysyn bildire kele: «Almaty qalasynyń ákimdigi bizge «Bıznestiń jol kartasy-2020» baǵdarlamasy aıasynda «kásipkerlik sektoryn saýyqtyrý» baǵytynda senim artty. Qala bıligi qurylys kezinde barlyq talaptardyń qatań saqtalýyn qadaǵalady. Bul óz kezeginde nysandy paıdalaný kezindegi qaýipsizdiktiń kepili bolatyny sózsiz», dedi. Sonymen, «Happy Eye» qury­ly­synyń tehnıkalyq turǵydaǵy jumystaryn AQSh pen Japo­nııanyń jer silkinisine qaýipti aı­maqtarynda osyǵan uqsas nysan­dardyń qury­lysymen aına­lysqan Technical Park ıtalııalyq kom­pa­nııasy atqarǵan. Atalǵan jobaǵa 1,6 mıllıard teńge ınvestısııalanǵan. «Happy Eye» qurylysyna ketken qarajat 5-7 jylda ózin ózi aqtaıdy degen esep bar. Salmaǵy 360 tonnany quraıtyn sholý dóńgeleginiń irgetasyn quıý úshin 857 tonna beton qajet bolǵan. Joǵaryda atap ótkendeı, «Happy Eye» tehnıkalyq talaptarǵa saı qurastyrylǵan jáne memlekettik saraptamadan ótken. Oǵan qosa, Qazaq qurylys jáne sáýlet ǵylymı-zertteý jáne jobalaý ınstıtýtynyń mamandary táýelsiz saraptama júrgizgen. Aınash ESALI, «Egemen Qazaqstan» ALMATY