Reseı Sırııaǵa eń sońǵy úlgidegi zymyran keshenin jetkizdi

Reseı Sırııaǵa óte alys qashyqtyqty kózdeıtin, qanatty zymyrandardy atyp qulata alatyn, sońǵy úlgidegi S-300V4 júıesin jetkizdi. Bul aqparatty lenta.ru basylymy Fox News telearnasyna silteme jasap habarlady. Keshen ótken senbi kúni Sırııanyń Tartýs qalasyndaǵy áskerı bazaǵa ákelingen. Fox News habaryna qaraǵanda, bul - S-300V4 kesheniniń Reseıden tysqary jerge birinshi ret ákelinýi. S-300V4 qanatty zymyrandardy qulatýǵa arnalǵan, al Sırııadaǵy "Islam memleketi", "Djebhat an-Nýsra" sııaqty uıymdarda qanatty zymyrandar joq. Soǵan qaraǵanda Reseı Sırııada AQSh pen onyń odaqtastarynyń shabýylynan qaýiptenip otyr degen joramal jasaıdy telearnanyń habaryna qatysqan sarapshylar. 2015 jyldyń qarasha aıynda túrik áskerı áýe kúshteri reseılik áskerı ushaqty atyp qulatqan soń Reseı Latakııa bazasyna S-400 áýe shabýylyna qarsy júıesin ornalastyratynyn resmı túrde habarlaǵan bolatyn. Al keshe, ıaǵnı 2016 jyldyń 3 qazany kúni AQSh Memlekettik departamenti Sırııada beıbitshilik ornatý jóninde Reseımen aradaǵy kelissózderdiń toqtatylatynyn málimdedi. Sebebi Reseı óziniń mindettemelerin oryndamaı otyr, "AQSh-tyń tózimi taýsyldy" dedi vedomstvo ókili Djon Kırbı. Egemen-aqparat