Reseıden Qazaqstanǵa keletin týrıster sany kóbeıýde

«Qazaqstanǵa Reseıden keletin týrıster sany jyl ótken saıyn kóbeıip keledi. Máselen, 2015 jyly elimiz reseılik azamattar úshin syrtqa shyǵatyn týrızm boıynsha tanymaldylyǵy jaǵynan  4-shi orynǵa shyqty. Qazaqstanǵa 3 mln reseıliktiń kelip, kórikti jerlerimizben tanysyp qaıtýy – sonyń aıǵaǵy. Qonaqtar eń kóp tynyǵatyn óńirler  – Býrabaı shıpajaı aımaǵy, Pavlodar oblysyndaǵy Baıanaýyl ulttyq saıabaǵy, Balqash jáne Alakól kólderi, sondaı-aq, Shymbulaq taý-shańǵy shıpajaıy». Qazaqstan men Reseı Federasııasynyń XIII óńiraralyq yntymaqtastyq forýmy aıasynda «Qazaqstan Respýblıkasy men Reseı Federasııasy arasyndaǵy týrızmdi damytýdyń jańa múmkindikteri» taqyrybynda ótken paneldik sessııa kezinde elimizdiń Investısııa jáne damý vıse-mınıstri Tımýr Toqtabaev osylaı dedi. Al Reseı Federasııasy Mádenıet mınıstrliginiń týrızm boıynsha federaldyq agenttiginiń jetekshisi Oleg Safonov Rostýrızm mekemesi reseılik-qazaqstandyq qarym-qatynas múmkindikterin barynsha keńeıtý baǵytyndaǵy is-sharalardy jan-jaqty atqaryp jatqanyn jetkizdi. Onyń aıtýynsha, TMD-ǵa múshe memleketterdiń Týrızm jónindegi keńesiniń jelisi boıynsha TMD-nyń ortaq týrıstik keńistigin qurý baǵytyndaǵy jumystar júıeli júrgizilip, oǵan Qazaqstan da belsendi atsalysyp jatyr eken.  «Forým aıasynda «Qazaqstan men Reseı arasynda týrızmdi damytýdyń jańa múmkindikteri» taqyrybynda paneldik sessııa otyrysyn ótkizý – elderimizdiń áleýmettik-ekonomıkalyq qatynastary qurylymyn qalyptastyrýda, halyqqa arnalǵan mádenı-tanymdyq jáne saýyqtyrý baǵdarlamalaryn júzege asyrýda týrızm ındýstrııasynyń qanshalyqty rólge ıe ekendigine aıqyn dálel», dedi Oleg Safonov. Láıla EDILQYZY