Taılandtaǵy Qazaqstan týrısterin abaı bolýǵa shaqyrdy

Taılandtaǵy qaıǵyly sharalarǵa baılanysty Qazaqstannyń Investısııalar jáne damý mınıstrligi qazaqstandyq týrısterden qurmet belgisi retinde sypaıy kıinýdi jáne el aldynda kóńil kótermeýdi ótindi. «Qazaqstan Respýblıkasy Investısııalar jáne damý mınıstrligi Týrızm ındýstrııasy departamenti Taılandtaǵy qazaqstandyq týrısterdi qaraly kúnderi monarhtaryn aza tutqan turǵyndarǵa qurmet retinde jabyq kıinip, baısaldylyq tanytýǵa, kópshilik oryndarda kóńil kótermeýge jáne qoǵamdyq oryndarda Taıland koroldik otbasynyń múshelerin talqylamaýǵa shaqyrdy. Sonymen birge, QR IDM Týrızm ındýstrııasy departamenti Taılandqa týrlardy júzege asyratyn týrıstik operatorlardan eldegi qaraly kúnderi ózin-ózi ustaý erejerimen klıentterdi habardar etýdi tabandy túrde talap etýde», - delingen Týrızm ındýstrııasy departamenti dırektory Marat Igalıdiń habarlamasynda. Esterińizde bolsa, 2016 jyly 13 qazanda Taıland koroli Phýmıpon Adýlıadet 89 jasqa qaraǵan shaǵynda dúnıeden ozdy. Ol 70 jyldan astam taqta otyryp, qazirgi zamanǵy eń uzaq bılikte otyrǵan monarh retinde tarıhta qaldy. Elde 1 jyl aza tutý jarııalandy. Taıland Premer-mınıstri Praıýt Chan-Ocha otandastaryn aldaǵy 30 kúnde kez kelgen oıyn-saýyq sharalarynan aýlaq bolýǵa shaqyrdy. Basylymdardyń habarlaýynsha, jeke týrıstik aımaqtar men keı dúkender jabylǵan. Endi bir dúkender ishimdik satýdy toqtatty. Aza tutý kezinde Taıland týrısteri meıramhanalar, bar, saýda ortalyqtary sekildi oıyn-saýyq túrlerine qatysty túrli shekteýlerge kez bolýy múmkin.