Soltústik Qazaqstanda kóne kólikter jınaıtyn qarııa turady

Soltústik Qazaqstan oblysy Taıynsha aýdanynyń turǵyny Anatolıı Gabchenkonyń ózgeden aıyrmasy - ol ómir boıy kóneniń kózindeı baıyrǵy zattardy jınaýmen aınalysyp keledi. Onyń jeke qorynda qazir on shaqty eski kólik , júzdegen kóne monetalar men ótken ǵasyrdaǵy turmystyq qural-jabdyqtar bar. Bul týraly «Habar 24» jazady. Anatolıı Gabchenkonyń aýlasyna jaqyndaǵan adamdy aldymen kózdiń jaýyn alatyn kóne kólikter ózine eriksiz baýrap alady. Mundaǵy tehnıkalardyń barlyǵy ótken ǵasyrdyń 1950 jyldarynan bastap 1970 jyldaryna deıin shyǵarylǵan. Arasynda tipti 1944 jyly qurastyrylǵan «Moskvıch» te bar. Ázirge bul osy kólikterdiń ishindegi eń eskisi. Al sar tústi kóliktiń qaı jylǵy ekeni belgisiz. Tek bir belgilisi, muny Anatolıı Gabchenko 1974 jyly Shýchınsk qalasynan satyp alǵan eken. Sol kezdiń ózinde bul kólik isten shyǵyp, júrýge jaramsyz bolyp qalǵan. Alaıda kónege qumar qarııa ony qalypqa keltirip, jýyp-shaıyp, tazalap qoıǵan. Qazir bul kólik, jurttyń qyzyǵa tamashalaıtyn eń bir eski kóligi. Bul kólikter qart kolleksıonerdiń sońǵy 15 jylda jınaǵandary. Qarııa olardy tek jınap qana qoımaı, ózi jóndep, júrgizýge tyrysady eken. Máselen osyndaǵy jeńil avtokólikter men motosıklderdiń qazir jartysyna jýyǵy júrip tur. «Osy jyldar ishinde 6 mashına men eki motosıkldi jóndep, júrgizip qoıdym. Endigi armanym, soǵys kezinde minilgen GAZ-678 kóligin qalypqa keltirý. Onyń biraz bólshegi ózimde bar bolatyn. Jaqynda qańqasyn Stepnıak qalasynan arnaıy alyp keldim. Jurttar maǵan eskini qaıtesiń, tasta deıdi. Men olaı ete almaımyn. О́ıtkeni bular - meniń ómirim», - deıdi zeınetker Anatolıı Gabchenko. Kóne saǵattar, eski útikter men ótken ǵasyrǵa tıesili basqa da buıymdardy qart kolleksıonerdiń garajynan kórýge bolady. Arasynda tipti 1872 jylǵy samaýryn da bar eken. Al aýyl balalary úshin munyń barlyǵy qyzyq. Danıl Verjbısskıı, oqýshy: - Men mundaı kólikterdi buryn tek teledıdardan kóretinmin. Al, myna jerde kórip, qatty tańǵaldym. Quddy bir murajaıǵa tap bolǵandaımyn. «Jergilikti mektep ujymy bul kisini túrli sharalarǵa qatystyrady. Ondaǵy maqsat - osynyń barlyǵyn balalarǵa kórsetý. Bul kisiniń bir ózi bir mýzeı. Jyl saıyn 9 mamyrda Anatolıı Gabchenkonyń kómegimen kóne kólikterdiń shaǵyn avtosherýin uıymdastyryp turamyz. Qart kolleksıoner endi osy bir ashyq aspan astyndaǵy kórmesin kánigi mýzeı retinde kórgisi keledi. Sol úshin de ol qazir barlyq buıymdardy qalypqa keltirip jatyr», - deıdi Kellerovka aýylynyń ákimi Erjan Jumabaev.