Slovenııada Qazaqstannyń Qurmetti konsýldyǵy ashyldy

QR Táýelsizdiginiń 25 jyldyǵyn merekeleý qarsańynda Marıbor qalasynda (Slovenııa) Qazaqstan Respýblıkasynyń Qurmetti konsýldyǵy ashyldy. Sharaǵa Slovenııa syrtqy saıasat vedomstvosynyń ókilderi, Marıbor qalasynyń basshylyǵy, iskerı jáne mádenı orta, konsýldyq korpýs pen BAQ ókilderi qatysty. Bul týraly primeminister.kz habarlady. Avstrııa men Slovenııadaǵy Qazaqstan elshisi Qaırat Sarybaı Qurmetti konsýl Gorazd Shıfrerge konsýldyq patent tapsyryp, onyń eki el arasyndaǵy baılanystyń nyǵaıýyna eleýli úles qosatynyna senim bildirdi. Qazaqstandyq dıplomat ekijaqty qatynastardyń keleshegi týraly aıta otyryp, Qazaqstannyń Slovenııamen túrli salalarda ózara yntymaqtastyqty odan ári damytýǵa qyzyǵýshylyq bildirip otyrǵanyn málimdedi. Slovenııa Syrtqy ister mınıstrliginiń Shyǵys Eýropa, Ońtústik Kavkaz jáne Ortalyq Azııa departamentiniń basshysy Andreıa Pýkart Martınes Marıbor qalasyndaǵy Qazaqstannyń Qurmetti konsýldyǵynyń ashylýyn jyly qarsy alyp, óz eliniń Qazaqstanmen seriktestik baılanysty tereńdetýge múddeli ekenin jetkizdi. Tanymal zańger ári qoǵam qaıratkeri G. Shıfrer eki el arasyndaǵy dostyq baılanysty nyǵaıtý úshin barlyq kúsh-jigerin jumsaýǵa daıyn ekenin atap ótti. QR SIM-niń habarlaýynsha, Qurmetti konsýldyqtyń ashylýy aıasynda Marıbor qalasy ýnıversıtetiniń kitaphanasynda qazaqstandyq sýretshilerdiń óner týyndylary kórmesi jáne Eýropa elderi konservatorııalarynda dáris alyp jatqan Qazaqstannyń jas mýzykanttarynyń óner kórsetý sharasy ótti. Aıta ketý kerek, Slovenııanyń ekinshi iri qalasy bolyp tabylatyn Marıbor osy eldiń iri ekonomıkalyq jáne mádenı ortalyqtarynyń biri bolyp sanalady.