Álıhan Bókeıhannyń qurmetine shyqqan moneta resmı tanystyrylady

Erteń Alash kósemi, Álıhan Bókeıhannyń  qurmetine arnalǵan saltanatty sharanyń biri – Qazaqstan Respýblıkasynyń Ulttyq Banki shyǵarǵan mereıtoılyq estelik monetanyń saltanatty tanystyrylym rásimi ótedi. Alashtanýshy-ǵalymdar men «Aq jol» QDP, QR Ulttyq Bankiniń uıymdastyrýymen ótetin aıtýly shara 18 qazan kúni  saǵat 12.00-de Astana qalasyndaǵy Saraıshyq kóshesi №5 úıde ótedi. Moneta Alash qozǵalysynyń jetekshisi, Alashorda úkimetiniń tóraǵasy Álıhan Bókeıhannyń týǵanyna 150 jyl tolýyna oraı estelik retinde shyǵarylǵan. «Bul tanystyrylym sharasy – Álıhan Bókeıhannyń tulǵalyq qasıetin aıqyndaý isine qosylǵan úlken úles. Qazaq aıtady: «Tasqa basylǵan tańba eshqashan óshpeıdi» dep. Álıhan Bókeıhannyń tulǵalyq qyry endi mine ulttyq banktiń merekelik monetasyna beınelenip otyr. Bul degenińiz – bolashaq kúnderi ulttyq mýzeıler men kórmelerge qoıylyp, óziniń tarıhı qunyn arttyratyn, sapaly ári qundy, qymbatty eksponat bolary haq. Monetaǵa Álıhannyń tulǵalyq kelbetin beıneleý degenimiz – onyń tulǵalyq qyryn jastar men jasóspirimderge nasıhattaý, tanytý degen sóz. Qazaq eline shet elden keletin qonaqtar, týrıster ulttyq banktiń shyǵaryp otyrǵan bul monetasyn ózderine kádesyı retinde satyp alyp, Qazaq elinen ákelgen táberigimiz dep urpaqtaryna aıta júreri anyq» - deıdi uıymdastyrýshylardyń biri, alashtanýshy Eldos Toqtarbaı.