Bıylǵy qys Qazaqstanda qarly bolady

Qazaqstanǵa qys erte  keledi. Bul týraly baspasóz máslıhatynda  «Qazgıdromet» RMK aýa raıynyń uzaqmerzimdi boljamdar basqarmasynyń basshysy Gúlmıra Aqysheva málim etti. «Uzaqmerzimdi boljamǵa sáıkes, elimizde qys erte kelip, qarly bolady dep kútilýde. Qarasha aıynyń birinshi jartysynda elimizdiń soltústik óńirinde qar turaqty jamylǵysy bolady, al ońtústik óńirlerinde qarashanyń ekinshi jartysynda qar jatady», - deıdi G. Aqysheva. Onyń sózine qaraǵanda, qarashada aýa raıy qubylmaly bolady, ıaǵnı jaýyn-shashyn men tuman, kóktaıǵaq jaǵdaılary jıi bolady. Atap aıtqanda, Qazaqstannyń basym bóliginde temperatýralyq rejim klımattyq norma aıasynda qalyptasady, al jaýyn-shashyn normadan artyq túsedi dep kútiledi. «Aıtarlyqtaı sýyq temperatýrany qarashanyń ekinshi onkúndiginiń sońynda jáne úshinshi onkúndikte boljap otyrmyz. Ol kezde soltústik, shyǵys, ortalyq óńirlerinde aýanyń synap baǵanasy túnde 15-27 gradýsqa deıin tómendese, kúndiz  8-15 temperatýrany kórsetedi. Al batys, ońtústik aýmaqtarda túnde 5-12, kúndiz 0-5 gradýs deńgeıinde baıqalmaq»,-dedi ol.