Rıo Olımpıadasynyń chempıony Danııar Eleýsinov ózi oqyǵan №54 mektepke baryp, dene shynyqtyrý sabaǵyn ótkizdi. Chempıonmen qatar, mektep oqýshylaryna «Astana» prezıdenttiń klýbynyń sport menedjeri Iýrıı Melnıchenko men «World class» fıtnes klýbynyń ustazdary sabaq berdi.
Sabaq júrgizý kestesine saı, sportshylar aldymen dene shynyqtyratyn jattyǵýlardy, sondaı-aq, fıtnestegi sońǵy jattyǵýlardy kórsetip shyqty. Olımpıada chempıony Danııar Eleýsinov sport adam densaýlyǵyna qajetti faktorlardyń birden biri ekenin kórsetti, dep habarlaıdy «Astana» prezıdenttik klýbynyń baspasóz qyzmeti.
«Dene shynyqtyrý páninde balalardyń denesin shynyqtyratyn jattyǵýlarǵa kóp kóńil bólgen jón. Biz búgingi sabaǵymyzdyń basynda jáne sabaqtyń sońyna qaraı dene shynyqtyratyn jattyǵýlardy úırettik. Ol jattyǵýlardyń birazyn men kúndelikti jatyǵýlarymnyń arasynan qosqamyn. Jalpy, dene shynyqtyrý balalardyń bilimin damytyp, densaýlyǵyn nyǵaıtý úshin eń kerek pánderdiń biri. «Dene shynyqtyrý» jobasynyń arqasynda balalar sportqa bas buryp, deni saý ult tárbıeleımiz degen oıdamyn. Shynyn aıtsam, bir top balamen jumys istegennen góri, jeke-jeke daıyndaǵan unaıdy. Biraq, mine, búgin sabaq júrgize otyryp, mualimderdiń qadirin, jumystarynyń ońaı emestigin túsindik»,-dedi D.Eleýsinov.
Prezıdenttik klýbtyń menedjeri Iýrıı Melnıchenko mektep oqýshylary sportqa myqtap kirisse, bolashaqta Danııar Eleýsinov sııaqty chempıon bolatyndaryna senim bildirdi.
Aıta keteıik, «Dene shynyqtyrý» jobasy - «Samruk-Kazyna Trust» áleýmettik jobalardy damytý qorynyń qoldaýymen bastalǵan joba jáne balalar men jasóspirimderdi dene shynyqtyrý men sportqa shaqyratyn bastama.
