Eki qolǵa – bir jumys

«Damý» qory men «Shyraq» qaýymdastyǵy múmkindigi shekteýli 180 áıeldi kásipkerlikke baýlıdy «Damý» qory men «Shyraq» múgedek áıelder qaýymdastyǵy múmkindigi shekteýli qyz-kelin­shekterdi kásipkerlikke baýlý kýrs­­taryn bastamaq. Almatyda arnaıy baspasóz máslıhatynda tusaýy kesilgen joba aıasynda Qazaqstannyń 16 qalasynda 180 múmkindigi shekteýli áıeldi oqytý josparlanǵan já­ne sonyń ishinen 90 áıel kele­si kezeńde qaıta oqytý men bilik­tilikti arttyrý kýrstaryna irik­telip alynǵany málim boldy. Bul jobanyń ereksheligi tek múmkindigi shekteýli áıelderge demeý bolyp qoımaı, sondaı-aq olardy qyzmetker retinde qabyldaýǵa daıyn jumys berýshilerge de qoldaý kórsetilmek. Iаǵnı bir jaǵynan múgedek jandardy psı­hologııalyq jáne kásibı turǵyda daıyndap, tájirıbeden ótýlerine múmkindik berilse, jumys be­rýshilerge múgedektigi bar jumys­shyny qabyldaý kezindegi táýe­kelderin azaıtyp, keńes berý, tájirıbelik aqparattandyrýdy júzege asyrady. Aıta ketý kerek, joba Japonııa, Reseı men Germanııa sııaqty damyǵan elder­diń tájirıbesine qurylǵan. Jobaǵa muryndyq bolyp otyrǵan «Damý» qorynyń óki­li Záýre Masǵutovanyń aıtýynsha, múmkindigi shekteýli áıelderdiń jumysqa ornalasýy men óz kásibin damytýyna qoldaý kórsetý óte mańyzdy. Zertteýler nátıjesi kórsetkendeı, múmkindigi shekteýli áıelderdiń negizgi bóligi (36,1%) kásibı kýrstardan ótý men qaıta daıarlaýǵa muqtaj ekendigin kórsetip otyr. Bilim jetildirý qajettiligi bıznes-saýattylyq baǵytynda ǵana emes, sonymen qatar psıhologııalyq tosqaýyldardy jeńý, ózin-ózi baǵalap, ózine degen senimdilikti arttyrý sııaqty mańyzdy jaıttardyń ózektiligi anyq baıqalýda. Mundaı saýaldamalar bıznesti júrgizý úshin múgedek áıelder kásipkerlik qyzmetti retteıtin Qazaqstan Res­pýblıkasynyń zańdaryn bilý qajettiligin, qarjylyq qa­rajattyń esebi men olardy basqarý salasyndaǵy biliktilikti arttyrý, bıznes-jospar jasaý, taýar/qyzmettiń ótimdiligin arttyrý, kásibı kýrstardan ótý sekildi máselelerdi alǵa shyǵaryp otyr. Sonymen qatar, kásipker retinde ózin kórsetý, tenderlerge qatysý úshin arnaıy bilim alý men óz bıznesin damytýda adamdardy uıymdastyrý qabileti de mańyzdy ról atqarady. «Shyraq» qaýymdastyǵynyń tóraıymy Lázzat Qaltaeva, zertteý barysynda jeke bıznes basshylary men ókilderi, qoǵamdyq birlestikter men memlekettik qurylymdardan turatyn 75 jumys berýshi arasynda saýaldama júrgizilgenin qosa aıta ketti. Jumys berýshilerdiń 56 paıyzy múmkindigi shekteýli áıelderdi jumysqa qa­byldaýǵa daıyn ekendikterin jetkizse, 44 paıyzy qarsylyǵyn bildirgen. Kásiporyndar ıeleri múmkindigi shekteýli áıelderdi jumysqa qa­byldaý úshin tıisinshe qoldaý men yntalandyrý sharalaryn júzege asyrý kerek degendi aıtýda. Aınash ESALI, «Egemen Qazaqstan» ALMATY