Belgııalyqtar onkologııa ortalyǵyn salady

Ońtústikke ınvestısııa salyp, áriptestik qarym-qatynasty nyǵaıtýǵa nıetti memleketter kóbeıip keledi. Solardyń biri – belgııalyq «Willemen Groep NV» kompanııasy. Oblys ákimi Janseıit Túımebaev turǵyn úı men ǵımarattar jáne avtojoldar, medısınalyq nysandar salýǵa mamandanǵan iri kompanııanyń prezıdenti Iohan Vıllemen jáne ókilderimen kezdesip, eki jaqqa da paıda ákeletin máseleler jóninde keńesti. Sońǵy jyldary oblysta on­ko­logııalyq aýrýlar jasaryp ket­ti. Sonyń saldarynan ólim-ji­timniń kóbeıip ketken jaǵdaıy ba­r. Keńeste Shymkent qalasynan ınves­tısııalyq quny 250 mln eýro bolatyn 350 oryndyq onkologııa ortalyǵyn salý jóninde kelisimge qol qoıyldy. Búginde Shymkent pen Saryaǵash, Tashkent baǵytynda jaqsy jol salynyp jatyr. Al Ońtústiktiń eń halqy kóp aýdany ári úsh jaǵynda О́zbekstanmen shektesip jatqan Maqtaaraldy oblys ortalyǵymen baılanystyratyn joldyń sapasy syn kótermeıdi. Trassa tar bolǵan­dyqtan, jol apattary da jıi oryn alyp, adam ólimine soqtyryp jatady. Belgııalyq kompanııa osy baǵyt­taǵy magıstraldy salýǵa nıetti ekendigin tanytty. Sońǵy jyldary Shymkent áýejaıy mańynda tur­ǵyn úıler kóbirek salynyp ketti. Oblystyń burynǵy basshysy áýejaıdy basqa jerge kóshirý jó­ninde bastama kótergen bolatyn. Búgin­gideı álemdik daǵdarys kezinde ol – óte qymbat joba. Oblystyń jańa basshysy ázirge Shymkent áýejaıy termınalyn jańǵyrtý jaıyn­da kelisimge keldi. О́zara yntymaqtastyq jaǵdaıda ótken basqosýdan soń oblys basshysy osy ınvestısııalyq jobalardy iske asyrý maqsatynda jumys tobynyń qurylatyndyǵyn aıtty. Ońtústiktiń dárigerleri búginde búırek, baýyr transplantasııasyn jasaýda Almaty, Astanadan keıingi orynda tur. Turǵyndar úshin qaýipti dert – qaterli isiktiń aldyn alý ári der kezinde anyqtap emdelý asa ma­ńyzdy bolatyn. Jańadan salynatyn onkologııalyq ortalyq osy kúrdeli máseleni retteıdi. Baqtııar TAIJAN, «Egemen Qazaqstan» Ońtústik Qazaqstan oblysy