Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Jeneva kantony ekonomıka jáne qaýipsizdik mınıstri, Shveısarııa Konfederasııasynyń memlekettik keńesshisi Per Modeni qabyldady, dep habarlady Qazaqstan Respýblıkasy Parlamenti Senatynyń baspasóz qyzmeti.
Jenevanyń burynǵy meri retinde P.Mode Q.Toqaevtyń 2011-2013 jyldary BUU Bas hatshysynyń orynbasary, BUU Jeneva bólimshesiniń Bas dırektory laýazymyn atqarǵan kezdegi qyzmetin joǵary baǵalady. Taraptar birlesken kúsh-jigerdiń arqasynda jahandyq dıplomatııanyń ortalyǵy retindegi Jenevanyń mártebesi aıtarlyqtaı arta túskenin atap ótti. Senat Tóraǵasynyń aıtýynsha, álemde geosaıası shıelenister órship turǵan búgingi jaǵdaıda BUU-nyń Jenevadaǵy shtab-páteri kópjaqty kelissózder, janjaldardyń aldyn alý, daǵdarystardy retteý úshin mańyzdy alań retinde odan ári jan-jaqty qoldaýdy qajet etedi.
Senat Tóraǵasy Qazaqstan men Shveısarııa arasyndaǵy saýda-ekonomıkalyq qarym-qatynastardy nyǵaıtý jónindegi P.Modeniń nıetine quptaý bildirdi. Qazirgi ýaqytta, Qazaqstannyń álem elderimen saýda aınalymynyń kólemi boıynsha Shveısarııa besinshi orynda tur. 2015 jyly ekijaqty saýda kólemi 2,79 mıllıard AQSh dollaryn qurady. Sonymen qatar, Shveısarııa sońǵy on jylda Qazaqstan ekonomıkasyna 14,5 mıllıard dollar ınvestısııa salǵan iri ınvestorlardyń biri bolyp tabylady.
Tóraǵanyń aıtýynsha, ekijaqty yntymaqtastyqtyń oń úrdisin damyta berý qajet. Osyǵan baılanysty, Q.Toqaev P.Mode bastaǵan Shveısarııa kásipkerleri delegasııasynyń sapary ózara tıimdi qarym-qatynastarǵa jańa serpin beretinine senim bildirdi.
Sońǵy jańalyqtar
Pedagogterdi attestasııalaý júıesi jańartylady
Bilim • Keshe
Atyraý oblysynda jer ýchaskeleri memleketke qaıtaryldy
Aımaqtar • Keshe
Atom energetıkasy salasy: Uzaq merzimdi baǵdar aıqyndaldy
Energetıka • Keshe
Japonııada 7,7 baldyq jer silkinisi tirkeldi
Tabıǵat • Keshe
