Eginge túsken qaraýsyz mal ıelerine yqpal etý máselesi qozǵaldy

Avtokólik joldary men eginge túsken baǵýsyz mal ıelerine tıisti túsindirý jumystaryn júrgizý kerek. Búgin Parlament Májilisiniń jalpy otyrysynda depýtat Káribaı Musyrman osy máseleni kóterdi, dep habarlaıdy Egemen-aqparat. «Meniń depýtattyq saýalym QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov pen QR Ádilet mınıstri Marat Beketaev myrzalarǵa arnalady. Aýyldyq jerlerde baǵýsyz bos júretin maldardyń kóshelerdi lastap, jasyl jelekti basyp, janshyp, otap, sondaı-aq qorshaýlardy qıratyp jurtshylyqtyń renishin týǵyzýy jáne ósip turǵan eginge túsip, sharýalardy shyryldatýy áli de tyıylmaı keledi. Sharýalar óz egisterin qorǵaý úshin jaz boıy birneshe kúzetshi ustap, qosymsha shyǵyndaýǵa májbúr. Qaraýsyz maldar qarańǵy túnde aýyldardyń mańynan ótetin avtomobıl joldaryna shyǵyp ketip, zardaptar alýǵa jáne jol-kólik oqıǵalaryna da sebepshi bolyp júrgenderi de jasyryn emes. Alaıda, qarapaıym aýyl turǵyndary túgil, keıbir aýdandyq máslıhattardyń hatshylary, aýyldyq okrýgterdiń ákimderi men ýchaskelik ınspektorlardyń ózderi de egindi búldirge baǵýsyz mal ıelerine ákimshilik yqpal etý sharalary baryn bilmeı shyqty», - dedi Káribaı Musyrman. Onyń atap ótýinshe, qoldanystaǵy zańnamada kóshelerdi ósip turǵan jasyl jelekti joıyp, gúlzarlar men qorshaýlardy búldirgen mal ıelerine ákimshilik yqpal etý sharalary qarastyrylmaǵan bolyp shyqty. «Sondyqtan jergilikti atqarýshy organdarǵa turǵyndar arasynda keńinen túsindirý jumystaryn júrgizý, jóndi tapsyrma berýdi jáne Ákimshilik quqyq buzýshylyq týraly kodekske tıisti tolyqtyrýlar engizýdi suraımyz»,-dedi depýtat.