2016 jyldyń sońynan bastap «Azamattarǵa arnalǵan úkimet» usynatyn memlekettik qyzmetter sanyn 792-ge deıin arttyrady. Bul týraly málimet Qazaqstan Respýblıkasynyń Premer-Mınıstriniń resmı saıtynda jarııalandy.
QR Aqparat jáne kommýnıkasııalar mınıstri Dáýren Abaev vedomstvonyń jaýapty departamentine 2016 jyldyń sońyna deıin «Azamattarǵa arnalǵan úkimet» korporasııasy arqyly memlekettik qyzmetti elektrondyq túrde kórsetý 60%-dan kem bolmaýy kerektigin jáne jańa 53 memlekettik qyzmetti ınterasııalanǵan júıege qosýdy aıaqtaýdy tapsyrdy.
«Qazirgi tańda bizde memlekettik qyzmetti alýdyń 3 negizgi arnasy bar: «Elektrondy úkimet» portaly; «Azamattarǵa arnalǵan úkimet» memlekettik korporasııasy; memlekettik qyzmet kórsetý suraqtary boıynsha biryńǵaı baılanys ortalyǵy. 2016 jyldyń 9 aıynda 30 mln-nan astam elektrondyq qyzmet kórsetildi, 17,4 myń elektrondyq lısenzııa, 433,5 myń ruqsat qujaty berilip, 800 myńnan astam adam tirkeldi», - dedi D. Abaev mınıstrliktiń 9 aıdyń jumysyn qorytyndylaýǵa arnalǵan alqa otyrysynda. Mınıstr aıtyp ótkendeı, Memleket basshysynyń tapsyrmasymen HQKO, Jyljymaıtyn múlik ortalyǵy, Zeınetaqy tóleý jónindegi memlekettik ortalyq, Jer kadastrynyń ǵylymı-óndiristik ortalyǵy sekildi 4 memlekettik kásiporyndy biriktirý arqyly «Azamattarǵa arnalǵan úkimet» memlekettik korporasııasy quryldy. «Aǵymdaǵy jyldyń 1 qazanyndaǵy jaǵdaı boıynsha Memlekettik korporasııa 29 mln-nan astam qyzmet kórsetken. Búginde memlekettik qyzmet tiziliminde 739 memlekettik qyzmet túri bar, onyń 530-yn elektrondy úkimet portaly jáne Memlekettik korporasııa arqyly alýǵa bolady. Azamattarǵa yńǵaıly bolýy úshin memlekettik qyzmet alýǵa qatysty qajetti qujattar men olar bergen ótinishtiń qaı satyda turǵany sekildi tıisti keńesterdi alýǵa bolatyn 1414 biryńǵaı nómiri engizildi», - dedi vedomstvo basshysy. Sonymen qatar, mınıstr jemqorlyq qaýipteri týraly da aıtyp ótti. Ol mysal retinde Petropavldaǵy Memlekettik korporasııa qyzmetkeriniń jemqorlyq boıynsha ustalǵanyn aıtty. «Osyndaı derekter barlyǵymyzǵa da qatysty dep esepteımin. Sondyqtan bolashaqta osyndaı faktilerdiń qaıtalanbaýy úshin sharalardy kúsheıtýdi tapsyramyn. Barlyqtaryńyzǵa jeke jaýapkershilik arttyrylady. Mınıstrliktiń memlekettik qyzmetti damytý departamenti Memlekettik korporasııamen birigip 2016 jyldyń sońyna deıin memlekettik qyzmetti Memlekettik korporasııa arqyly elektrondyq túrde kórsetýdi 60 paıyzdan kem etpeı, jańa 53 memlekettik qyzmetti ınterasııalanǵan júıege qosýdy aıaqtaýy kerek», - dep tapsyrma berdi D. Abaev.
