Búgin Ystambul qalasynda Túrki keńesi men BUU О́rkenıetteri alıansynyń (UNAOC) birlesip uıymdastyrýymen «Ekstremızmge qarsy kúreste jastardyń róli» atty halyqaralyq konferensııa óz jumysyn bastady.
Jıynnyń ashylý saltanatynda sóz alǵan BUU О́rkenıetter alıansynyń Joǵary ókili Násir Abd ál-Ázız An-Naser, Túrkııa premer-mınıstriniń orynbasary Tuǵryl Túrkesh pen Túrki keńesiniń bas hatshysy Ramıl Gasanov álemdik ekstremızmniń jastarǵa áseri men tóndiretin qaýipi jaıly keńinen baıandady.
Saltanatty sharaǵa BUU janyndaǵy uıymdardyń joǵary laýazymdy ókilderi, Túrkııa úkimet músheleri, halyqaralyq uıym basshylary, dıplomattar, sonymen birge memleket jáne qoǵam qaıratkerlerimen qatar Halyqaralyq Túrki akademııasynyń (TWESCO) delegasııasy qatysty.
Eki kúnge jalǵasatyn ǵylymı jıynǵa Afrıka jáne Ortalyq Azııanyń 40-qa jýyq memleketinen kórnekti ǵalymdar, jas kóshbasshylar men bilikti sarapshylar kelgen. Jalpy konferensııada ekstremızmniń saıası, áleýmettik damý aspektileri men lańkestik toptardyń paıda bolý sebepteri, sondaı-aq ekstremızmmen kúresýde jastardyń róli sekildi birqatar keleli máseleler tóńireginde oı bólisip, pikir almasý josparlanǵan.
Aıta ketý kerek, bul konferensııanyń nátıjeleri bıyl qarasha aıynda Qyrǵyzstanda «Jastar jáne sport» taqyrybynda ótedi dep josparlanǵan Túrki keńesi Memleket basshylarynyń altynshy sammıtinde usynylatyn bolady.
